Ish deputetja e Partisë Demokratike, Albana Vokshi, deklaroi se Partia Demokratike ka fakte për të gjitha paligjshmëritë e kryera gjatë votimeve në 30 qershor.
Ajo tha se Partia Demokratike ka monitoruar qendrat e votimit që nga hapja e tyre e deri në mbyllje. Gjatë këtij procesi sipas saj ata kanë regjistruar presione ndaj administratës e deri te manipulimi i numrave të pjesëmarrësve nga KZAZ dhe KQZ.
Vokshi paralajmëroi se këto fakte do të publikohen dhe do të ndiqen në rrugë ligjore.
“Kjo çka po thuhet dhe evidentohet në media vërteton atë çka PD kishte kohë që e thoshte, ishte një farsë elektorale. Por duket se Rama s’e ka mbajtur dot nën kontroll vjedhjen dhe manipulimin masiv të votave.
Ne kemi qenë në terren, duke krijuar grupe pune ashtu si do të ishim në një ditë normale zgjedhjesh në Shqipëri. Kemi monitoruar që hapjen e qendrave të votimit e deri tek mbyllja e të fundit qendër, kemi regjistruar të gjitha parregullsive, paligjshmëritë, presionet që i janë bërë administratës publike, shitblerjet, numrat e shtuar nga KZAZ e më pas KQZ, që vijon të veprojë si kamikaze politike e Edi Ramës. Kemi faktuar çdo parregullsi dhe paligjshmëri. Ne si PD do ti bëjmë evidente të gjitha parregullsitë dhe fajtorët duhet të shkojnë para ligjit, cilido qoftë. Duhet të shkojnë para ligjit, përndryshe asnjëherë tek ne s’do të ketë zgjedhje të lira e të ndershme”, deklaroi Vokshi
Ajo falënderoi të gjithë qytetarët, demokratë dhe socialistë që bojkotuan dje votimet moniste.
“Falenderoj me mirënjohje të madhe të gjithë demokratët që refuzuan të marrin pjesë në votimet, jo zgjedhjet e 30 qershorit. Falënderoj edhe socialistët e ndershëm që nuk votuan për sektin rilindas që Rama po mundohet prej vitesh t’ja imponojë PS. Falenderim edhe për ata të paparti e të tjerët që përbëjnë 85 % të shqiptarëve që u thanë jo votimeve moniste. Mirënjohje e pafund” shtoi ish-deputetja Albana Vokshi. /Opinion.al
