Në ceremoninë e përvjetorit të 20-të të hyrjes së trupave të NATO-s në Kosovë do të marrë pjesë edhe ish presidenti amerikan Bill Clinton bashkë me ish Sekretaren amerikane të Shtetit, , Madeleine Albright.
Prezenca e Clinton është konfirmuar nga Këshilli Organizativ për shënimin e 20 vjetorit të hyrjes së trupave të NATO-s në Kosovë.
”Më 12 qershor 2019 Kosova shënon 20 vjetorin e hyrjes së trupave të NATO-së. Ne jemi duke shënuar këtë përvjetor historik të Kosovës bashkë me miqtë dhe aleatët tonë me të cilët ndajmë vlerat e paqes, lirisë dhe demokracisë. Njëkohësisht, ne po nderojmë të kaluarën tonë dhe vizionin tonë për paqe të qëndrueshme.
Ish- Presidenti i Shteteve të Bashkuara të Amerikës, Bill Clinton, do t’i bashkëngjitet popullit të Kosovës në shënimin e 20 viteve të lirisë, dhe do të mbajë fjalim në Tubimin Qendror për Shënimin e 20 vjetorit të hyrjes së trupave të NATO-së në Kosovë” shkruhet në Facebook.
Clinton ka patur një rol kyç si president i SHBA në vendimin e nisjes së fushatës bombarduese të NATO që u finalizua me përfundimin e konfliktit dhe çlirimin e Kosovës.
Presidenti i Kosovës, Hashim Thaçi pati shpallur muaj më parë, vitin 2019, si vit të NATO-s. /Opinion.al
