Ish-kreu i Komisionit Qendror të Zgjedhjeve, Kristaq Kume e ka përshëndetur vendimin e Presidentit Ilir Meta për të anuluar datën e zgjedhjeve lokale të 30 qershorit.
Në një intervistë televizive ai tha se vendimi i presidentit ishte i mirëpritur, pasi vendi ndodhet në një krizë të thellë politike.
Por çfarë ndodh më pas me zgjedhjet lokale? Kume thotë se e vetmja mundësi që dekreti i Presidentit (që pritet të hënën), të atakohet është në Gjykatën Kushtetuese, e cila nuk është funksionale. Për shkak të kësaj situatën, ky dekret mbetet vetëm të zbatohet.
“Shtyrjen e zgjedhjeve besoj se presidenti do ta firmosë ditën e hënë bashkë me arsyetimin juridik. Ky dekret ka vetëm një mundësi për t’u atakuar dhe ky është në Gjykatën Kushtetuese. Në kushtet kur nuk është Gjykata Kushtetuese, mbetet që ky dekret të zbatohet. Në qoftë se do t’i referohemi po prapë Gjykatës Kushtetuese që ka trajtuar në dy raste në vendimet që merr Presidenti i Republikës, ajo e fundit në shkurt 2002 përcaktohet në vendimin e Gjykatës Kushtetuese se mund të ankohen në Gjykatën Administrative të Apelit, aktet individuale me karakter administrativ. Në këtë rast nuk është dhe si i tillë nuk mund të shqyrtohet në gjykatën administrative të apelit”, deklaroi Kume.
Në deklaratën e tij, presidenti fton “të gjithë aktorët e përgjegjshëm vendas dhe ndërkombëtarë të bashkojnë kontributet konstruktive për rivendosjen urgjent të dialogut të pazëvendësueshëm politik dhe për gjetjen e një zgjidhjeje të shpejtë dhe që i shërben të ardhmes evropiane të Shqipërisë”.
Nga Berati, ku po fliste në një takim elektoral, ka mbërritur reagimi i parë i kryeministrit Edi Rama, i cili e ka cilësuar “gabim” vendimin e Presidentit, duke theksuar se “zgjedhjet do të mbahen deri në 30 Qershor”.
Rama deklaroi se “e prisja edhe këtë dhe nuk është asgjë tjetër veçse mbyllja e një rrethi të një plani të bërë me kohë për një arsye, për arsyen se nuk kërkohet shtyrja e zgjedhjeve, kërkohet marrja zvarrë e kësaj qeverie dhe varrosja e reformës në drejtësi.Por as qeverinë se marrin zvarrë as reformën se varrosin dot dhe ne në 30 qershor do bëjmë zgjedhje, sepse zgjedhjet janë të popullit, as të partive as të presidentit”.
Nga protesta e organizuar përpara selisë së Qeverisë, kryetari demokrat Lulzim Basha, deklaroi se vendimi për anullimin e 30 Qershorit , ishte sipas tij “është prova e parë e forcës tonë të bashkuar, por është vetëm një hap i vogël përpara. Ne do ta vazhdojmë këtë betejë, deri në fitore”./ Opinion.al
