Gjatë takimit me qytetarët në Urën Vajgurore, kryeministri Edi Rama ka folur dhe për përgjimet e publikuar nga gazeta gjermane “Bild”.
Rama tha se PS nuk ka marrë asnjë person në mbrojtje, duke u shprehur se kreut të Bashkisë së Durrësit Vangjush Dako, po i bëhet një gjyq popullor.
Kryeministri theksoi se drejtësia do ta vendos nëse Dako është fajtor apo jo. Por sipas tij, mbi bazën e këtyre përgjimeve, nuk mund të dilet në një përfundim i tillë.
“Përgjimet e neveritshme, se askush nuk mund të çohet dhe të thotë që ne kemi hapur gojën apo për të çuar dorën për të penguar drejtësinë. Nuk na ka parë askush për të marrë në mbrojtje këdo qoftë që duhet të dalë para drejtësisë, ajo do e vendos kush është i fajshëm apo i pafajshëm. Drejtorin e Tatimeve e kishin të dënuar dhe e çonin përditë si të pafajshëm deri në vendimin e formës së prerë. Ne e kemi bërë të qartë ndarjen, drejtësia ka punën e vetë dhe prandaj jemi e vetmja forcë për të çuar deri në fund atë reformë në drejtësi. Ata duan që të bëjnë gjyqe popullore, pa prova, pa hetime pa asgjë”,-tha Rama.
Kryeministri ka komentuar deklaratën e drejtueses së Prokurorisë për Krime të Rënda, Donika Prela mbi dosjen “339”.
Shefi i qeverisë e cilësoi këtë reagim si të vonuar, por sipas tij, kanë qenë prokurorët të cilët kanë nxjerrë hetimet dhe më pas janë përdorur nga partitë për politik.
“Dëgjojeni deklaratën e drejtueses së Prokurorisë për Krime të Rënda. Me shumë vonesë për fat të keq, por ka shpjeguar arsyen se përse këto zbulime të mëdha, janë një abuzim i madh me ligjin dhe nxjerrjen e sekretit hetimor për politik dhe kundër Shqipërisë, dëgjojeni dhe lexojeni kush janë personat që i kanë mbajtur në sirtar. Prokurorët i kanë çuar te partia për t’i përdorur për politik, sepse i bashkon shumë gjera ata: Lufta kundër Reformës në Drejtësi. Prokurorë e politikanë që i tremben Reformës në Drejtësi. Të gjitha ato që kanë ndodhur “drejtësia vonon, por harron”. Drejtësia ka vonuar shumë, por mos harroni që nuk po bëjmë drejtësi popullore, por ndërtojmë një sistem drejtësie me ndërkombëtarët ku prokurorët e gjykatësit nuk do të kenë lidhje me politikanët”, tha Rama. / Opinion.al E.Xh.
