Gjashtë ish deputetë të Partisë Demokratike janë nën akuzë se kanë ushtruar dhunë ndaj efektivëve të policisë në Drejtorinë e Tiranës pas protestës së 16 shkurtit.
Vetë ish deputetët mohojnë akuzat dhe thonë që janë zyrtarët e lartë të policisë ata që kanë ushtruar dhunë. Pas përplasjeve që ndodhën në ambientet e drejtorisë së policisë së Tiranës, ish deputetët thonë së i kanë gjetur drejtuesit e lartë të policisë duke pirë alkool. Për këtë kanë publikuar edhe një foto gjatë emisionit Opinion të ditës së mërkurë.
Ndërkohë Ministri i Brendshëm Sandër Lleshaj ka mohuar akuzat e ish-deputetëve të opozitës. Ai ka thënë se kjo akuzë është e pavërtetë dhe për më tepër nuk justifikon hyrjen me dhunë në institucionin e policisë. Për ministrin, ish deputetët kanë kryer një akt të turpshëm dhe kjo është e dokumentuar me pamje filmime.
“Është e pavërtetë, por edhe sikur të ishte e vërtetë nuk justifikon hyrjen me dhunë në institucionin e policisë. Barriera etike dhe morale pengon të prekësh punonjësin e policisë. Të qënit deputet nuk u jep asnjë të drejtë të prekin punonjësit e policisë” tha Ministri Lleshaj. /Opinion.al
