Këto ditë këngëtarja shqiptare Loredana Zefi ka qenë në qendër të vëmendjes të mediave në Shqipëri dhe në Zvicër, për shkak të akuzave për marrjen e një shume prej 900 mijë frangash me dhunë e mashtrim një çifti zviceran.
Sipas mediave ajo është ndaluar nga policia dhe pas deponimit është liruar. Ditën e sotme ajo ka zhvilluar një konferencë për mediat në Prishtinë, ku është shprehur lidhur me ngjarjen duke theksuar se është e pafajshme.
“Asnjë personi nuk i janë marrë paratë me dhunë, me mashtrime, me kërcënim, këto para janë dhënë me vullnet – pala tjetër ka pranuar dhe e ka bërë me dëshirë. Është e vërtet që kam dhënë një deklaratë në polici, por nuk kam qenë asnjëherë e ndaluar. Prokurori më ka lejuar të shkoj në shtëpi tek vajza ime,”-ka thënë Loredana gjatë konferencës.
Gjithashtu ajo ka vijuar fjalën e saj duke shpjeguar sesi sipas saj ka nisur e gjithë kjo histori.
Kjo gjë ka filluar në 2016-n dhe nuk dija gjë për këtë rast. Nuk kam ditur asgjë për këtë rast. Familja ime ka huazuar disa para prej familjes zvicerane në vitin 2016. Në vitin 2018 disa pjesëtar të familjes Zefi më kanë treguar se mund të mbyllet ky rast. Unë nuk e di çfarë kanë bërë këta persona dhe pse nuk është mbyllur si rast. Kur e kam marrë vesh, kam dashur t’i ndihmoj, sepse familja ime është mbi të gjitha. Nuk më intereson media, muzika, kur vjen fjala për familjen time. Do jem me familjen time në kohë të mira dhe të vështira. Është e vërtetë, kam dhënë deklaratë në polici dhe burri më ka pritur jashtë. Më besoni nuk janë këto gjëra të vërteta, ose dhe mos e besoni. Gjërat do sqarohen. Kam 7 vëllezër dhe dy motra, babai im na ka mësuar që asgjë nuk është më e shtrenjtë se familja,”-ka thënë Loredana. Ndër të tjera ajo tha se nuk ishte larguar nga Zvicra prej kësaj ngjarje, por sepse duhet të niste xhirimet e videoklipit të saj të ri./Opinion.al/
