Gjykata e Shkallës së Parë në Shkodër ka dhënë masën e sigurisë “arrest me burg” për Barush Bregun, i cili u arrestua në zonën e Komunës së Parisit në Tiranë të shtunën. 33-vjeçari nuk ka thënë asnjë fjalë përpara togave të zeza, aq më pak përpara hetuesve.
I konsideruar nga policia si një person me rrezikshmëri të lartë, ai fshihej prej disa javësh në një banesë në katin e fundit të një pallati tek Komuna e Parisit. Bregu ndihmohej në arratinë e tij nga Bajram Çekorja, 21 vjeç, po nga Shkodra.
Sipas policisë Bregu është i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie ‘Arrest në burg’, për armëmbajtje pa leje, pasi në shtator të vitit 2018, gjatë një operacioni të zhvilluar nga Policia, në banesën e këtij shtetasi u gjet një armë zjarri kallashnikov dhe municion luftarak.
Sipas burimeve 33-vjeçari ishte pjesë e grupit “Lici”, rival me grupin e “Bajrave”, përplasja e të cilëve ka shkaktuar dhjetëra viktima në Shkodër. Thuhet se Bregu është përdorur për disa ngjarje kriminale por ende zyrtarisht nuk bëhet i ditur roli i tij./ Opinion.al
