Akuzat e ish-kryeministrit Sali Berisha se të arrestuarit për ngjarjen e Rinasit janë “koka turku”, Ministri i Brendshëm Sandër Lleshaj i quan intimidime ndaj punës hetimore. Ai i referohet Berishës si “Haxhi Mileti”, duke thënë se policia në një kohë shumë të shkurtër pas ngjarjes së rëndë, po arrin të identifikojë grabitësit me metoda dhe mjete shkencore.
“Shenjë e dëshpërimit është edhe sulmi ndaj Policisë së Shtetit, jo vetëm fizike, por edhe verbale. Në ditët kur policia po heton me mjete shkencore dhe po identifikon grabitësit e Rinasit me mjete dhe metoda shkencore, po sulmohet. Po bëhen sulme nga një person, që unë në shenjë proporcioni sepse edhe ai ka hequr dorë nga adresimi me emrin e vërtetë, unë i them Haxhi Mileti, të gjithë e dinë kush është. Do të doja të sillja në mendjen tuaj vijimin me konsistencë të sulmit ndaj policisë, që është përpjekje për të intimiduar hetimet, duke bërë avokatinë e një prej bandave më të rrezikshme, që ka krijuar problematika të mëdha në disa vende, në Shqipëri, Greqi, Kosovë, ka sulmuar banka, ka grabitur, ka lidhje me celula terroriste”, tha Lleshaj.
Ai gjithashtu foli edhe axhendën e opozitës, që sipas Lleshajt kërkon të zbehë arritjet në reformën në drejtësi.
“Reforma në drejtësi nuk gjen mbështetje nga segmente të caktuara nga politika, që krijon një mjedis skizofrenik për të relativizuar, zbehur, fjalën “reformë në drejtësi” nga diskursi publik. Jemi dëshmitarë që krijohen axhenda paralele ku vetëm fjala reformë në drejtësi nuk përmendet, janë gati të vënë zjarr kudo por askund nuk flitet për reformën në drejtësi. Sot pati një grup të vogël të rinjsh para Parlamentit, që në përpjekjen për të qenë “inovativ”, kishin vënë një banderolë të turpshme, “Ti Shqipëri s’më jep nder”. Gjë e turpshme, nga një grupim i caktuar politik që krijon dëm në përpjekjet për të mbijetuar në kushtet e një reforme që e bën të vështirë mbijetesën e atyre që kanë borxhe të mëdha me drejtësinë. Shenjë e dëshpërimit është edhe sulmi ndaj Policisë së Shtetit, jo vetëm fizike, por edhe verbale”, tha Lleshaj./Opinion.al
