Teksa në opinionin publik është hapur një debat për prezencën e Forcave të Armatosura në aeroportin e Rinasit, kryeministri Edi Rama ka vendosur të japë shpjegimin e tij me një foto në Instagram.
Ai thotë se forcat ushatarake janë të vendosura në shumë aeroporte evropiane dhe në vende demokratike të botës, si reagim ndaj akteve cenuese për sigurinë. Rama thotë se ushtarakët në Shqipëri nuk janë vendosur brenda aeroportit të Rinasit, por në perimetrin rrethues të tij.
“Forcat ushtarake në aeroportet e Parisit, Venecias, Frankfurtit dhe Amsterdamit, janë vendosur ashtu si në plot vende të tjera të Europës dhe botës demokratike, si reagim ndaj akteve cënuese për sigurinë e infrastrukturave aeroportuale dhe qytetarëve që i përdorin ato. Ndërkohë beretat e kuqe të policisë sonë ushtarake janë vendosur thjesht në ruajtje të perimetrit të jashtëm të sigurisë. Prandaj kush flet për shkelje kushtetute, gjendje lufte, juntë ushtarake e marrëzira të tjera si këto, le të gjejë ndonjë arsye tjetër për të treguar se sa shumë i dhimbsen Kushtetuta dhe standardet demokratike”, ka shkruar Rama.
Gjatë ditës së sotme, Presidenti Ilir Meta i ka kërkuar sqarime zyrtare Shefit të Shtabit të Përgjithshëm në lidhje me angazhimin e ushtrisë në ruajtjen e aeroportit. Edhe ish-Presidenti Bujar Nishani e ka quajtur një akt që bie ndesh me Kushtetutën, duke folur për instalimin e juntës ushtarake.
Nga ana tjetër, Ministrja e Mbrojtjes Olta Xhaçka dhe Ministri i Brendshëm Sandër Lleshaj e kanë quajtur diçka normale, pasi detyra kryesore e ushtrisë është ruajtja e sigurisë kombëtare./Opinion.al
