Ministri i Brendshëm Sandër Lleshaj ka folur në Parlament në lidhje me grabitjen e Rinasit. Ai ka thënë se është një incident që mund të ndodhë kudo, duke dënuar këdo që e ka quajtur turp kombëtar. Lleshaj ka mbrojtur vendimin për angazhimin e ushtrisë, duke thënë se është detyrë kushtetuese e Forcave të Armatosura të garantojnë sigurinë e shtetit.
“Gjëra të tilla mund të ndodhin kudo. Ajo që ka ndodhur është e rëndë. Ne kemi marrë masa të forta të plota për të zhbërë një histori turpi që është transferuar para 20 viteve në duart e një privati. Transferuam sovranitet në duart e një koncesionari privat. Nëse shikoni do të gjeni edhe emra të njohur që kanë kontribuuar në këtë situatë. Po është një cënim i sigurisë kombëtare dhe jo rrëzim. Ushtria e ka në mision kushtetues sigurinë kombëtare. Nëse konstatojmë se është cenuar apo kërcënuar, ushtria ka detyrë që të japë kontributin e tyre. Nuk është turp kombëtar por incident, mos harroni 11 shtatorin se cfarë ndodhi, apo goditje terroriste, por asnjë komb nuk cohet të shpallë gjendje të pa shpresë. Nuk ka asgjë për t’u alarmuar. Policia reagoi në kohë rekord dhe në mënyrë të paparë. Ky grup kriminal është arratisur nga burgu i një vendi anëtar të BE-së, por nuk u shpall turp kombëtar atje”, ka thënë Sandër Lleshaj.
Më herët, deputeti i LSI-së Ralf Gjoni i kërkoi dorëheqjen Lleshajt, nëse nuk identifikohen autorët dhe nuk konfiskohen paratë.
“Zoti Lleshaj unë në vendin tuaj nëse fajtorët e këtij krimi nuk identifikohen dhe konfiskohen paratë unë do të kisha dhënë dorëheqjen, jo sot por brenda 2-3 javëve”, tha Ralf Gjoni.
Sandër Lleshaj i është përgjigjur, duke i thënë se postin mund ta lërë me kënaqësi, pasi nuk ka luftuar asnjë ditë për të.
“Meqë më përmende dorëheqjen, nuk kam luftuar asnjë ditë për ta pasur këtë post, nuk kam asnjë brengë për ta lenë, faleminderit për rekomandimin por atë e gjykoj unë me dinjitetin personal”, tha Lleshaj. /Opinion.al
