Konsujt e Nderit në Shqipëri, të cilët lëvizin me targa diplomatike “CD” nuk do ta kenë më këtë privilegj. Në një deklaratë për mediat, Ministri i Jashtëm në detyrë Gent Cakaj tha se në kundërshtim me ligjin, sipërmarrës, pronarë mediash, afaristë që shërbejnë si Konsuj Nderi të vendeve të ndryshme të botës në Shqipëri, duhet të dorëzojnë targat diplomatike dhe të zbatojnë ligjin. Bëhet fjalë për 38 persona që shërbejnë si Konsuj Nderi në Shqipëri.
“Bëhet fjalë në përgjithësi për qytetarët shqiptarë, që ne jemi të nderuar t’i kemi Konsuj Nderi, biznesmenë, pronarë mediash, afarist, që janë ngarkuar nga vende të ndryshme nga çdo cep i botës si Konsuj Nderi në Shqipëri dhe qarkullojnë me privilegje diplomatike njësoj si ambasadorët dhe trupi diplomatik i akredituar. Shqipëria është e nderuar t’i ketë Konsuj Nderi, por edhe ata do të jenë më të nderuar nëse do të veprojnë sipas ligjit. Ligji thotë se “Konsujt e Nderit, pavarësisht nga shtetësia, ekzluzivisht përdor automjete me targa normale, por vetëm me një shenjë ovale në anë të targave.” Në shkelje janë 38 Konsuj Nderi që janë pajisur me targa “CD”. Ky privilegj special, krejt unikal në Europë, është i pajustifikueshëm e duhet të marrë fund. Me përulësinë për këtë veprim, informoj të gjithë personat në fjalë se zyra e protokollit do të fillojë me kontaktimin e tyre për të dorëzuar targat dhe do të pajisen me shenjën ovale. Për të shmangur neglizhencën e deritanishme, do të kontaktojmë Ministrinë e Transporteve dhe Ministrinë e Brendshme që targat e tyre të dalin jashtë funksionit”, ka thënë Gent Cakaj.
Për t’i paraprirë spekulimeve në media, ai ka thënë se kjo nismë nuk ndërmerret për emra të veçantë, por vetëm për të siguruar zbatimin e ligjit. “Përkundër çdo lloj spekulimi mediatik, nuk ndërmerret për emra të veçantë, vjen vetëm nga domosdoshmëria e respektimit të ligjit dhe praktikave ndërkombëtare në Shqipëri”, u shpreh Cakaj.
Në fund, ai paralajmëroi edhe një masë reformuese për lëshimin e pasaportave diplomatike. “Ne jemi në përgatitje të një mase tjetër reformuese, duhet të marrim masa në fuqizimin e dinjitetit të pasaportës diplomatike shqiptare pasi është vënë në pikëpyetje nga shumë vende për shkak të mënyrave se si është dhënë deri tani. Jemi në proces reformimi edhe për pasaportën diplomatike”, tha Gent Cakaj./Opinion.al
