Marrëdhënien e tij me Edi Ramën e krahasoi si mishi me thoi. Erion Veliaj nga studio e emisionit “Opinion” ka thënë se të gjitha zërat që kanë dalë për marrëdhëniet mes tyre nuk janë të vërteta.
E për të treguar marrëdhënien e mirë ai tha se flet 20 herë në ditë në telefon me Edi Ramën.
Fevziu: A ka pasur një ngërç në lidhje me kandidimin tuaj?
Veliaj: Nuk ka pasur asnjë ngërç, problemi është se në një situatë ku çdo gjë gatuhet në kafe, ku ka diversion, as e kemi marrë parasysh të merremi me këto diversione. Të rrinim ta komentonim, ishte pa dobi. Thamë kur të kishte një kongres, do të kishte një vendimmarrje.
Fevziu: Ishte pala juaj që infiltronte informacione të tilla.
Veliaj: Nuk më rezulton kështu, unë dhe kryeministri kemi qenë të qartë me vizionin, që me idiotësitë dhe thashethemet nuk do të merreshim. PS tha kur të bëhet kongresi, do të shpallen kandidatët.
Fevziu: Zoti Veliaj, a ka një ftohje me Edi Ramën, një lloj largësie?
Veliaj: Mishi me thoin nuk di të jenë më afër se ne. Në 30 vite pluralizëm nuk di të ketë pasur një kryeministër që ka qenë kaq afër sa unë me Edi Ramën. Unë dhe kryeministri flasim mesatarisht 20 herë në ditë. Unë jam pjesë e kryesisë së PS, jap kontributin tim në vendimmarrjen qendrore të PS.
Fevziu: A ka ngjallur një lloj xhelozie se jeni më popullor se Rama?
Veliaj: Kur unë kam filluar të punoj me Ramën, ai ishte në sondazhe mbi 80%, sepse lloji i punës si kryetar bashkie, që nuk është në Parlament, por është në terren ka në përgjegjësi rrugën, çerdhet, kopshtet. Kur unë punoja për Edi Ramën ai ishte 80%, kur kryeministri nuk ishte as 20%. Kur ka një sondazh, është vetë Rama që ma thotë i pari, me krenarinë që nuk është vetëm shefi, por shoku im. Më ka promovuar, më ka mbështetur në ditët më të vështira, edhe larg syrit të medias. /Opinion.al
