Të hënën në mbrëmje, në emisionin “Opinion” gazetarja Klodiana Lala tha se dy vëllezërit indianë, që janë në kërkim për pastrim parash në vlerën e 720 milionë dollarëve, janë larguar nga Rinasi me një avion privat.
Lala tha se dy vëllezërit Sandesara u larguan në të njëjtën ditë kur policia kufitare arrestoi kunatin e tyre, Hitesh Patel.
Pas zbulimit të fakteve të reja që dolën në dritë nga arrestimi i tij, Ministria e Jashtme njoftoi ndërprerjen e mandatit si konsull nderi për njërin nga vëllezërit, Nitin Sandesara.
Ndërkohë sipas Top Channel dy indianët do të votonin në Sauk.
“Nëse ju referohemi listave te zgjedhësve të Njësisë Administrative të Farkës, Nitini dhe Cetankumari kanë përkatësisht numrat 432 dhe 434. Por numri 433 në listën e zgjedhjeve është bashkëshortja e një prej dy vëllezërve. Ajo quhet Diptiben Sandesara. Ajo ka marrë nënshtetësinë dhe Pasaportën shqiptare në shtator të vitit 2018 disa muaj pas bashkëshortit të saj. I vëllai i saj u arrestua pak ditë më parë në aeroport ndërsa dyshohet se gruaja mundi të largohej nga Shqipëria”, raporton Top Channel. /Opinion.al
