Monika Kryemadhi është pyetur sot nga mediat për deklaratat e Ilir Metës, në lidhje me dorëheqjen si President nëse kjo gjë i shërbente zgjidhjes së krizës. Kryemadhi ka thënë se si bashkëshorte nuk merret fare me punën politike, ndërsa si kryetare e LSI-së thotë së qëndrimi i partisë nuk ka lidhje me qëndrimet e Presidentit.
“Si bashkëshortja e tij nuk merrem fare me punën politike, si Kryetare e LSI-së, Lëvizja Socialiste për Integrim ka pozicionin e saj shumë të qartë, në marrëdhënie me Parlamentin, në marrëdhënie me qeverinë,në marrëdhënie me Reformën në drejtësi, e cila ka dështuar, sepse sot shqiptarët janë në rrugë për shkak të mungesës së Gjykatës Kushtetuese sepse ligji për dividentin që Presidenti e ktheu, këta përsëri manipuluan në mënyrën më kriminale dhe korruptive në Komisionin e Ekonomisë dhe e rikthyen ligjin edhe një herë në fuqi, sepse krijonte varfërinë e shqiptarëve. […] Presidenti le të bëjë punën e tij, ajo është puna e tij zyrtare, legjitime jo legjitime nuk kam asnjë arsye për ta komentuar, unë jam këtu për të komentuar pozicionin e Lëvizjes Socialiste për Integrim dhe më shumë si qytetare sesa si kryetare”, është shprehur sot nga protesta e opozitës Monika Kryemadhi.
Ilir Meta tha dje se është gati të dorëzojë mandatin, nëse i shërben zgjidhjes së krizës. “Jam i gatshëm për të dyja ekstremet. Që nga dorëzimi i mandatit tim si President pasi të sigurohem që vendi ka një zgjidhje politike parimore, kushtetuese, solide që e çon përpara, e deri tek sakrifikimi i jetës sime si Salvador Allende për të ndaluar instalimin e një junte që mund ta kthente Shqipërinë 30 vite pas”, është shprehur Meta./Opinion.al
