Pas takimit me Drejtorin e Zgjerimit në Bashkimin Europian Christian Danielsson, Lulzim Basha ka dhënë një prononcim për mediat. Ai ka thënë se në takimin me Danielsson e ka konsideruar regjimin e Edi Ramës të mbaruar, ndërsa disa herë ka folur për ndryshime kushtetuese.
“Opozita sot ka pasur një mundësi tjetër për të shprehur jo thjesht dhe vetëm vendosmërinë e saj për të çliruar Shqipërinë nga kjo gjendje. Sot kemi shprehur vendosmërinë tonë që jo thjesht të largohet Rama, por të shembet ky sistem. Kjo kërkon angazhim të plotë jo vetëm të faktorit politik shqiptar, por të kujtdo që i dhimbset ky vend. Të garantojmë që zgjedhjet e ardhshme të mos kapen kurrë nga krimi, të garantojmë drejtësi të pavarur. Ndryshimet kushtetuese të vitit 2008 zhbalancuan balancën e pushteteve, me qëllimin e mirë për të larguar kandidatët me precedentë kriminalë, por që sollën në vitin 2013 dhe 2017 më shumë kriminelë në pushtet. Formula e zgjidhjes është kjo: Regjimi i Ramës ka mbaruar, shqiptarët e kanë përcaktuar rrugën ku do të ecin, opozita ka për detyrë ta ndërtojë këtë rrugë, ku respektohen të drejtat e njeriut. Për këtë duhet reformë e thellë kushtetuese, reformë elektorale. Te vullneti politik, duhet hetim i plotë i dosjes 339 dhe 184 dhe çuarja përpara drejtësisë të politikanëve që kanë vjedhur votat”, ka thënë Lulzim Basha.
Më parë, Christian Danielsson ka zhvilluar takim me kryeprokuroren Arta Marku dhe kryeministrin Edi Rama. Për takimin me Ramën, Danielsson tha se Shqipëria duhet të japë rezultate në luftën kundër krimit dhe korrupsionit, për të fituar besimin e vendeve anëtare të Bashkimit Europian në qershor./Opinion.al
