“Parlamenti është zgjedhur në mënyrë legjitime, ju keni një qeveri legjitime. Ndaj mendoj se përqendrimi për të pasur qeveri tranzitore, heq vëmendjen nga procesi i anëtarësimit. Uniteti duhet për datën 19 qershor”, tha kryesuesi i delegacionit evropian në Tiranë, Tunne Kelam.
Edhe Fleckenstein dhe eurodeputetët e tjerë thanë se në asnjë mënyrë nuk mbështesin idenë e ndërrimit të qeverisë. Ata thanë se këtë qëndrim kanë mbajtur edhe kur bojkotonte Edi Rama. “Ne thamë që zgjedhjet ishin të mira, nuk mund të themi pas një viti e gjysmë se ishin të këqija. Ne kemi ekspertizën më të mirë për monitorimin e zgjedhjeve, nuk e kuptoj kur thonë se zgjedhjet ishin të këqija.”
Nga ana e tij, Cristian Dan Preda, i cili në zgjedhjet e 2017-s ishte vëzhgues në vendin tonë, tha se i dukej e çuditshme që pas 1 viti e gjysmë disa politikanë shprehen se ato ishin të këqija. Në vlerësimin e tij, zgjedhjet në fjalë shkuan mirë.
“Unë jam përfaqësues i PPE-së, bojkoti për ne është i pa pranueshëm, abandonimi i mandateve është i pa pranueshëm për ne. E kemi thënë këtë gjë në fakt edhe kur ishte partia e Ramës ajo që bojkotoi dhe e përsërisim këtë qëndrim edhe sot. Ne jemi parlamentarë dhe kemi përgjegjësitë tona. Unë kam qenë këtu si vëzhgues i zgjedhjeve të 2017-s dhe përfundimet tona ishin se zgjedhjet shkuan mirë. Dhe nuk mund të themi pas 1 viti e gjysmë se zgjedhjet nuk ishin të mira. Dhe kur e dëgjoj këtë gjë nga disa parti dhe kur ata thonë se përfundimet e zyrtarëve europianë nuk janë korrekte, mërzitem pak, sepse ne kemi ekspertizën, përvojën më të mirë në botë, që respektohet në të gjithë botën sa i përket vëzhgimit të zgjedhjeve. Për mua është pak çudi që të dëgjoj politikanë shqiptarë që zgjedhjet në 2017 kanë qenë të këqija, nuk di çfarë do të thotë kjo. Ju lutem respektoni rezultatin e zgjedhjeve”, tha Dan Preda./Opinion.al
