Në konferencën e delegacionit të Bashkimit Europian, kryesuesi i këtij delegacioni Tunne Kelam u shpreh kundër vendimit të opozitës për bojkot. Ai tha se djegia e mandateve nuk e ndihmon anëtarësimin e Shqipërisë në Bashkimin Europian, teksa shtoi se bojkoti cenon besueshmërinë e Shqipërisë.
“Më lejoni të them që është jashtëzakonisht e rëndësishme që të mos shkaktohen vonesa në procesin e anëtarësimit të Shqipërisë në BE. Ne jemi po aq të interesuar ne që t’ju mirëpresim në BE, po aq sa mund të jenë edhe shqiptarët të interesuar. Keni bërë progres në shumë fusha, ku mbeten edhe shumë gjëra për t’u përmirësuar. Vëmendja jonë mbetet te reforma në drejtësi, të vettingu, gjëra që po shkojnë mirë, por nga eksperienca jonë duhet të ketë zbatim të ligjeve, jo thjesht ligje të reja. Për të marrë dritën jeshile për negociatat, duhet bashkëpunim i brendshëm. Sinjali më i keq që mund të japë Shqipëria, është transmetimi i idesë se ka ndasi shumë të mëdha, apo strategji të ndryshme politike. Kërkohet unitet politik, konsensusi kombëtar është i rëndësishëm. Kjo na shqetëson ne më tepër. Nëse Shqipëria është demokraci, nëse zgjedhjet janë mbajtur, mund të ketë probleme me zgjedhjet por nëse ato janë të pranuara, është e rëndësishme të aderojmë. Bojkotimi përbën një sinjal shumë të keq, cenohet besueshmëria e shtetit në tërësi. Nuk jemi dakord që bojkotimi i parlamentit do të ishte gjëja e duhur. U bëjmë thirrje partive, shoqërisë civile, që të ushtrojnë presion mbi aktorët e ndryshëm në mënyrë që të bashkohen me njëri-tjetrin. Nuk mund të gjesh dot një pretendim për të vonuar objektivin më të rëndësishëm kombëtar për shkak të pikëpamjeve të ndryshme. Vëzhgimi i dytë, është që protestat, demonstratat që kanë ndodhur para parlamanetit dhe përpara këshillit të ministrave, jemi kundër protestave të dhunshme. Jemi kundër nxitjes së dhunës nga partitë politike. Pasi jemi takuar me shumë përfaqësues të shoqërisë civile dhe organizata të rinisë, përfundimi ynë është që Shqipëria ka më shumë nevojë për hapësirë, organizatat e shoqërisë civile duhet të kenë akses në institucionet shqiptare duke marrë pjesë në ligjvënie. E ardhmja e Shqipërisë është rinia e saj.”/Opinion.al
