Këshilltarët socialistë në Bashkinë e Përrenjasit prej disa kohësh nuk votojnë buxhetin e vitit 2019. Për pasojë, sot janë mbyllur kopshtet dhe çerdhet, të cilat janë nën varësinë direkte të pushtetit vendor.
Kryebashkiakja e Përrenjasit, Miranda Rira thotë se këshilltarëve u bëhet presion edhe nga deputetët socialistë Taulant Balla dhe Nuri Belba për të mos votuar buxhetin. Ndërkohë, bashkia ka njoftuar prindërit që nga dita e nesërme të mos i çojnë fëmijët në kopshte dhe çerdhe.
Miranda Rira i përket Lëvizjes Socialiste për Integrim. Në zgjedhjet e vitit 2015 e fitoi këtë mandat me votat e të majtës së bashkuar.
Pak ditë më parë, e njëjta situatë ndodhi edhe në Bashkinë e Skraparit, pasi prej dy muajsh nuk jepen pagat. Edhe në këtë bashki, që drejtohet nga LSI, shkaku është i njëjtë: këshilltarët nuk miratojnë buxhetin. Kjo bashki tani e ka dërguar çështjen në gjykatën administrative.
