Një nga akuzat më të forta që opozita i ka bërë kryeministrit Rama në muajt e fundit, është ajo e përfshirjes së bashkëshortes së tij në aksionet e ABI Bank, që zhvillon aktivitetin në Shqipëri.
Kjo akuzë u artikulua me tone të forta edhe nga ish-kryeministri Berisha të enjten në Kuvend, gjë që solli edhe një debat të ashpër me kryeministrin Rama, që i cilësoi shpifje pretendimet dhe akuzat e opozitës.
Lidhur me këto akuza që kanë përfshirë ABI Bank (American Bank off Investments) ka folur edhe drejtori i kësaj banke, në Shqipëri, Andi Ballta.
Ballta i cilëson që në krye të herës politike akuzat që i drejtohen ABI Bank.
“ABI Bank është investimi më i madh amerikan i të gjitha kohërave në Shqipëri dhe NCH Capital është një nga investitorët e huaj më të rëndësishëm në rajon dhe më gjerë. Është për të ardhur keq që pasionet politike nuk kursejnë as sektorë sensitivë si ai bankar, apo investitorë të kalibrit ndërkombëtar si NCH Capital.”
Ballta ka sqaruar më tej se ABI Bank nuk është një bankë që funksionon në Amerikë, por bankë e investitorëve amerikanë në Shqipëri. Po kështu ka informuar edhe si funksionon lista e aksionerëve.
“Për të shmangur çdo keqinterpretim: Ne nuk jemi bankë në Amerikë por bankë e investitorëve të mirënjohur amerikanë në Shqipëri. NCH Capital është me qendër në Nju Jork dhe ka pothuaj 30 vjet eksperiencë investimi global.
NCH Capital nuk ka patur kurrë asnjë pjesëmarrje kapitali rus, apo të ndonjë kombësie tjetër në strukturën e aksionerëve të ABI Bank. NCH thjesht ka investuar kapital tërësisht Amerikan në Rusi dhe në Europën Lindore. Gjithashtu të gjithë aksionerët e ABI Bank janë të listuar publikisht dhe të aprovuar sipas të gjitha rregullave nga autoritetet rregullatore shqiptare që në vitin 2010.”
Në këtë kuadër, drejtori Ballta, i është përgjigjur edhe akuzës së ngritur nga opozita, që Linda Rama, bashkëshortja e kryeministrit Rama, ka pasur aksione në ABI Bank si edhe arsyeve të largimit të saj si këshilltare nga bordi i bankës.
“Linda Rama nuk ka qenë asnjëherë dhe nuk është aksionere apo zotëruese opsionesh të ABI Bank. Linda Rama ka qenë një anëtare e pavarur e Bordit. Zonja Rama ka qenë për tre vjet në Bordin e ABI Bank. Arsyeja pse Linda u ftua në Bord është për aftësitë e saj profesionale, njohjes time profesionale me të që në 1993, dhe nivelit të lartë të sofistikimit që një investitor i sofistikuar si NCH kërkon të ketë në Bordin e tij”
Po kështu z. Ballta ka sqaruar edhe faktin pse ABI Bank është e regjistruar si kompani offshore.
“Regjistrimi offshore nuk ka të bëjë me vendodhjen e investitorëve. Një investitor amerikan mund të regjistrohet në një vend ku sistemi i taksave është më i favorshëm. Nuk ka asgjë ilegale apo të parregullt si në legjislacionin Shqiptar apo dhe atë ndërkombëtar me regjistrimin offshore të investitorëve në momentin kur investitorët janë të deklaruar.”, përfundon sqarimin z. Ballta.
