Ministri i ri i Brendshëm Sandër Lleshaj po rikthen në detyrë ish-drejtorët e policisë. Pas Tonin Vocajt sot rikthehet Muhamet Rrumbullaku, i cili u emërua drejtor i Shërbimit për Çështjet e Brendshme dhe Ankesat (SHÇBA). Prezantimin e z. Rrumbullaku e ka bërë sot zv/ministri i Brendshëm, Besfort Lamallari.
Muhamet Rrumbullaku ka qenë Zv/Drejtori i Përgjithshëm i Policisë për Rendin dhe Sigurinë Publike 2009-2013, ndërsa më parë ka qenë Drejtor i Policisë së Tiranës dhe në disa qarqe. Ndërkohë që ky është rikthimi i dytë që bën Lleshaj, pas atij të Tonin Vocajt pak ditë më parë në krye të drejtorisë së Departamentit të Policisë Kriminale. Rrumbullaku gjatë viteve të fundit ka qenë pjesë e policisë, por si mësimdhënës në Akademinë e Policisë./Ri.De
