Banorët e Astirit kanë dalë në protestë të shtunën pasdite kundër projektit të Unazës së Re, projekt i cili prek dhe prish banesat e tyre. Prej dy muajsh në protestë, ata janë shprehur se do vijojnë të jenë në rrugë çdo ditë për të mbrojtur banesat e tyre me çdo çmim.
“Burg për hajdutët” dhe “qeveri e krimit” ishin disa nga thirrjet e banorëve. Ata shprehën mirënjohjen edhe për mediat, të cilat kanë ndjekur e pasqyruar nga dita e parë kauzën e tyre.
“Pas 7 janarit do të ngrihet i gjithë populli. Ministrat e tij do të jenë në burg. Kanë shkelur ligjin dhe kanë vjedhur. Unaza e Re është diçka tjetër, sepse këta njerëz janë të devotshmit e republikës. Ata janë ngritur për të mbrojtur pronat dhe nderin e tyre”, tha një nga banorët.
Në mbështetje të banorëve ka qenë edhe deputeti i PD-së, Klevis Balliu, i cili është shprehur se qytetarët e unazës kanë mbështetjen e opozitës së bashkuar.
