Kryeministri Edi Rama, të premten, deklaroi në “Zonë e Lirë”, se nga 1 janari nuk do të ketë lojëra fati dhe kazinot do lejohen vetëm në zonat turistike të vendit.
Kryeministri u shpreh pastaj se Tirana nuk është një zonë turistike dhe si rrjedhojë nuk do të ketë lojëra fati.
Më tej, Rama foli edhe në lidhje me shifrat e frikshme që ekzistojnë në këtë industri, ku sipas tij rreth 70% e lojëtarëve që luajnë bixhoz e nisin atë rreth moshës 10 deri në 15-vjeç.
Rama tha se më shumë se 70% e lojëtarëve kanë probleme me stresin dhe për një fakt të tillë, qeveria në vitin 2016 porositi një studim për të shqyrtuar afrimitetin e të dhënave me ato të vendeve të ndryshme.
Kryeministri tregoi se studimi u krye nga UT dhe ishte një studim i gjërë, ku kishte një numër të madh lojtarësh fëmijë dhe adoleshentë.
Rama u shpreh se kjo industri financohet nga krimi i organizuar dhe riciklon parat e fituara nga krimi i organizuar.
Sipas tij, janë gjysmë milioni që dalin nga arka e familjeve dhe shkojnë në këtë industri. Kryeministri mendon se këto para do frenohen dhe do ngelin në familjet shqiptare.
Për një fakt të tillë, ai merr shembullin e disa vendeve europiane. Për të, Franca është një shembull ku para shumë vitesh mori një iniciativë për të ndaluar radikalisht pikat e basteve.
Kryeministri tha se të hapësh një pikë bastesh në Francë, shkon tre vjet në burg. Ai, tregoi se ky shtet skedinën e basteve të futbollit e ka kthyer në monopol.
