Në letrën e saj të dorëheqjes dërguar Sekretarit të Përgjithshëm të OKB-së, ambasadorja në largim e Shteteve të Bashkuara, Nikki Haley i bëri thirrje Kombeve të Bashkuara të tërheqin misionin e tyre në Kosovë, UNMIK, duke thënë se ai e kishte përmbushur prej kohësh mandatin e tij.
Ambasadorja e SHBA-së në Kombet e Bashkuara, Nikki Haley, e cila krejt papritur dha dorëheqjen më 9 tetor, i kërkoi OKB-së në letrën e saj të dorëheqjes të tërheqë misionin e saj nga Kosova duke thënë se puna e tij kishte mbaruar.
Në letrën e saj drejtuar Sekretarit të Përgjithshëm të OKB-së, Antonio Guterres, Haley shkroi se misioni i UNMIK-ut kishte qenë i suksesshëm në menaxhimin e konfliktit kompleks në Kosovë, por koha e tij kishte mbaruar.
“Për fat të keq, UNMIK mbetet i pandryshuar, pavarësisht progresit dhe deklaratave të përsëritura nga shumica e anëtarëve të Këshillit të Sigurimit që UNMIK-u ka përmbushur prej kohësh mandatin e tij,” thuhet në letrën e dorëheqjes.
“Pa një rishikim të rregullt të mandatit dhe misionit të UNMIK-ut, politikat e jashtme dhe partitë me interesa të pafavorshme do të vazhdojnë të mbajnë peng kohën dhe burimet e çmuara të OKB-së,” vazhdon më tej letra.
Ajo i bën thirrje Sekretarit të Përgjithshëm të OKB-së të fillojë një rishikim strategjik të UNMIK-ut në mënyrë që të zhvillojë një strategji dalëse nga Kosova.
“Ndërmarrja e këtyre hapave do t’i japë Këshillit të OKB-së informacione për të vlerësuar praninë e OKB-së në Kosovë, siç bëjmë me të gjitha misionet paqeruajtëse,” shkroi Haley.
Misioni i Administratës së Përkohshme të Kombeve të Bashkuara në Kosovë u krijua në fund të luftës në Kosovë në vitin 1999 nga Këshilli i Sigurimit në bazë të Rezolutës 1244.
UNMIK-u është i detyruar “të ndihmojë në sigurimin e kushteve për një jetë paqësore dhe normale për të gjithë banorët e Kosovës dhe për të avancuar stabilitetin rajonal në Ballkanin Perëndimor”.
Fillimisht i përbërë nga katër “shtylla”, dy prej këtyre, policia dhe administrata civile, prej kohësh i janë dorëzua qeverisë së Kosovës.
Roli i tij ka qenë i vogël që kur Kosova shpalli pavarësinë në vitin 2008. Ndërkohë, BE-ja ka marrë përsipër rolin mbikëqyrës në sferën e drejtësisë, nëpërmjet misionit të vet, EULEX.
Burimi: Reporter.al
