Pasditen e sotme është vënë në pranga drejtori i Hipotekës në Shkodër, Zamir Leka si dhe vartësja e tij Frida Mirashi. Lajmi fillimisht është publikuar bazuar në burimet e gazetarëve pranë policisë së Shkodrës. Edhe pse arrestimet janë kryer në orën 16:00, Policia e Shtetit dhe as Prokuroria e Shkodrës, nuk ka publikuar asnjë informacion zyrtar mbi motivet dhe akuzat që rëndojnë ndaj zyrtarëve të shtetit.
Është ministrja e Drejtësisë Etilda Gjonaj ajo që ka vendosur ti tregojë publikut se kush e arrestoi drejtorin që ajo vetë e emëroi 10 muaj më parë.
Në një deklaratë për mediat thuhet se arrestimet kanë ardhur falë “platformës së bashkëqeverisjes shqiperiaqeduam.al dhe Task Forca Antikorrupsion e Qeverisë”.
“Një sërë operacionesh të finalizuara me sukses ditët e fundit janë frut i bashkëpunimit midis strukturave antikorrupsion, Policisë së Shtetit dhe Prokurorisë”, thotë Gjonaj.
Edhe pse deri më tani nuk kanë folur Policia dhe Prokuroria, ministrja e Drejtësisë duke bërë politikë me arrestimet thotë se “kjo tregon efektshmërinë në rritje të forcës goditëse të shtetit kundër korrupsionit”. /Opinion.al
