Me anë të një deklarate për shtyp, Deputeti i Partisë Demokratike Enkelejd Alibeaj, ka folur në lidhje me ligjin për teatrin, i cili kaloi të enjten që lamë pas në Parlament. Alibeaj e ka cilësuar një ligj mafioz, i cili vjen si pasojë e mungesës së Gjykatës Kushtetuese.
“Nëse ka një tregues që tregon se sa mafioz, është ligji për shembjen e Teatrit Kombëtar, dhe ndërtimin mbi të 6 kullave nga Edi Rama, ky tregues është mungesa e Gjykatës Kushtetuese. Shqipëria, vend anëtar i NATO-s, dhe që pretendon nisjen e negociatave të anëtarësimit në BE, është një vend ku Gjykata Kushtetuese, është nxjerrë jashtë funksionit, sipas një skeme të qartë mafioze të drejtuar nga Edi Rama”, u shpreh Alibeaj.
Ai e cilësoi këtë skemë si një mënyrë e Edi Ramës për të pastruar paratë e drogës, duke akuzuar Ramës se ai po kërcënon edhe pronarët e truallit. Alibeaj i ka bërë thirrje pronarëve të mos dorëzohen dhe të mos bien pre e mashtrimeve.
Në fund ai i ka bërë thirrje edhe Presidentit Meta që të vendosë Veto-n për këtë ligj.
“Në kushtet e azgjesimit të Gjykatës Kushtetuese nga mafia që na qeveris, ne po presim verdiktin e presidentit. Ne po presim që kreu i shtetit të vendosë veton e tij në ligjin mafioz, dhe të mos bëhet pjesë e grabitjes e së paku 200 milionë eurove”, u shpreh Alibeaj.
Pjesë nga deklarata
Partia Demokratike u bën thirrje pronarëve të rezistojnë ndaj çdo kërcënimi që po u bëhet nga kompania Fusha, e cila po përdor pushtetin mafioz të Edi Ramës për t’u grabitur pronën.
Nëse Gjykata Kushtetuese do të ishte sot në funksion dhe nuk do të mbahej peng nga Edi Rama, i cili ka bllokuar prej më shumë se 1 viti emërimet e reja, opozita, artistët, pronarët, qytetarët që kundërshtojnë grabitjen, do të kishin mundësi ta ankimonin ligjin në Kushtetuese dhe Gjykata të pezullonte çdo veprim të qeverisë.
Gjykata Kushtetuese do ta bënte këtë, sepse ligji për Teatrin bie ndesh me të paktën 4 nene të Kushtetutës dhe me dy ligje të tjera, atë “Për koncesionet dhe partneritetin publik privat”, si dhe me ligjin “Për vetëqeverisjen vendore”.
Në kushtet e asgjesimit të Gjykatës Kushtetuese nga mafia që na qeveris, ne po presim verdiktin e Presidentit të Republikës. Ne po presim që kreu i shtetit të vendosë veton e tij mbi ligjin mafioz Rama – Fusha dhe të mos bëhet pjesë e grabitjes e së paku 200 milionë eurove.
Përfitoj nga rasti, t’i bëj thirrje faktorit ndërkombëtar në Tiranë, që ka, gjithashtu, përgjegjësi pse vendi është pa Gjykatë Kushtetuese, të mos heshtë!
Të mos heshtë, njësoj si për drogën!
Të mos heshtë njësoj si për bllokimin e Gjykatës Kushtetuese, por të reagojë për të ndaluar grabitjen e pasurisë publike dhe private nga kryeministri barbar dhe i korruptuar që drejton sot Shqipërinë.
Partia Demokratike, opozita, qytetarët që duan ruajtjen e vlerave kulturore, si pjesë e identitetit tonë europian, qytetarët që duan Tiranën, qytetarët që nuk pranojnë grabitjen dhe qeverisjen nga mafia nuk do të lejojnë triumfin e së keqes!
