Kolegji i Posaçëm i Apelimit (KPA) ka rrëzuar përcaktimet e Prokurores së Përgjithshme të përkohshme, Arta Marku, në vendimet e saj, për pezullimin e prokurorëve Rovena Gashi dhe Dritan Gina.
Me vendimin e tij të sotëm KPA, ka vendosur të mos kalojë për shqyrtim çështjen e çiftit të prokurorëve, Rovena Gashi dhe Dritan Gina, për pezullimin e tyre nga detyra nga kryeprokurorja Arta Marku.
Bashkëshortët Gashi dhe Gina ankimuan në mes të muajit qershor në KPA vendimin e Arta Markut, e cila i pezulloi prokurorët nga detyra, për shkak të refuzimit të deklarimit të pasurisë.
Trupa e KPA ka vendosur të mos kalojë për shqyrtim në seancë plenare animimin e Ginës dhe Gashit, duke ‘ju hapur rrugë” atyre të ankohen në Gjykatën e Apelit Administrativ dhe jo te KPA, siç “rekomandonte” Arta Marku
“Kolegji i shqyrtimit paraprak të ankimit, me vendimin nr. 2/2018 (JD), datë 21. 06. 2018, bazuar në nenin 31, nenin 31/a, paragrafi 2, germa ‘a’, si dhe në nenin 71/a të ligjit nr. 8577, datë 10. 02. 2000 ‘Për organizimin dhe funksionimin e Gjykatës Kushtetuese të Republikës së Shqipërisë’, i ndryshuar, vendosi:
Moskalimin për shqyrtim në seancë plenare të çështjes nr. 2/2018 (JD), datë 17. 05. 2018 me palë ankuese znj. Rovena Gashi dhe z. Dritan Gina.
Objekt i këtij ankimi ishte ‘anulimi i vendimit nr. 140, datë 11. 05. 2018 të Prokurores së Përgjithshme të Përkohshme Arta Marku dhe anulimi i vendimit nr. 141, datë 11. 05. 2018 të Prokurores së Përgjithshme të Përkohshme Arta Marku etj.’. Kolegji i shqyrtimit paraprak, i caktuar me short, ishte i përbërë nga Ina Rama relatore, Rezarta Schuetz dhe Luan Daci anëtarë”, thuhet në njoftimin e KPA-së.
Me urdhër nr. 140, dhe nr. 141, dt. 11. 05. 2018, Prokurori i Përgjithshëm i Përkohshëm ka vendosur: “pezullimin e Rovena Gashi dhe Dritan Gina dhe t’i drejtohen Kolegjit te Apelimit për Ankim”.
Me këtë vendim, Kolegji i Posaçëm i Apelimit, është shprehur që vendimi i Arta Markut, në të cilin orienton Gashi-Ginën të ankohen në Kolegjin e Apelimit për vendimin e pezullimit, është i pasaktë. Sipas KPA-së, Arta Marku ka gabuar kur ka shënuar në vendimin e pezullimit se Gashi-Gina duhet t’i drejtohen Kolegjit të Apelimit për ankim. Kolegji i Apelimit është shprehur që Gashi-Gina duhet ti drejtojnë ankimin Gjykatës së Apelit Administrativ për ankimin e tyre. Pra, praktikisht KPA ka rrezuar përcaktimin e Arta Markut që i kërkon Gashi-Ginës të ankohen në Kolegj Apelimi nëse do të ishin kundër vendimit të pezullimit.
