Kryeministri Edi Rama iu shmang dje një debati në parlament me opozitën lidhur me vendimin e vendeve të BE për të shtyrë hapjen e negociatave me Shqipërinë për në 2019. As sot Kryeministri nuk e pranoi se negociatat janë shtyrë, por tha se “nuk kemi humbur 12 muaj, sepse janë 12 muaj punë që do bëheshin njësoj edhe me hapjen e negociatave”.
Mëngjesin e sotëm ai zhvilloi një takim me ambasadorë shqiptarë në vendet e BE dhe nëpunës të Ministrisë së Jashtme e më pas u shfaq para kamerave të ERTV për të përcjell mesazhin bashkë me ministrin Bushati. Në takim nuk mungoi as perfaqesuesja e BE ne Tirane, Romana Vlahutin.
Rama: “Ka një ndryshim midis çeljes së negociatave imediate dhe në 12 muaj, por është shumë formal. Edhe sikur çelja e negociatave të ishte imediate, ne do të na duhej një punë përgatitore që do të merrte një kohë që shkon deri në 12 muaj. Fakti që çelja e negociatave është e caktuar në 2019, por komisioni do të nisë menjëherë procesin përgatitor. Nuk kemi humbur 12 muaj, por kemi 12 muaj punë që do të bëheshin edhe me hapjen e negociatave.”
Ai më tej, u shpreh se nuk ka asnjë kusht shtesë gjatë kësaj periudhe. “Më vjen për të qeshur dhe qarë, kur dëgjoj se Europa ka vendosur 13 kushte, por nuk është kështu. Por këtu nuk është çështje kushtet, por përputhshmërisë së shtetit me vendet anëtare të BE, dy organizmat të bëhen një”, tha Rama.
Kryeministri u shpreh se Shqipëria ka kapërcyer një moment tejet delikat, pasi ka bërë më se çdo vend tjetër në këtë fazë. Sipas tij, procesi ishte i sofistikuar dhe me mekanizma djallezore.
“Është njohur nga të gjithë, edhe nga ata më skeptikët, që Shqipëria ka bërë më shumë se çdo vend tjetër në të njëjtën fazë. Ishte një rrezik real që të mbeteshim në këtë moment pa tekst. Të gjithë e dine që dy orë përpara vendimmarrjes nuk kishim tekst për shkak të dinamikës së brendshme të bisedimeve. Reforma në drejtësi te ne është unikale e gjithëpranuar si model që duhet shtrirë më tutje në të gjithë rajonin tonë, me kosto jot ë vogla, për të cilën ne rrezikuam koalicionin qeverisë. Për rëndësinë që ka Europa në ka në këtë territor, fqinjët tanë ndërruan emrin. Procesi është jashtëzakonisht i sofistikuar dhe me mekanizma djallëzorë që vetëm BE mund t’i krijojë dhe ka nevojë për një punë të jashtëzakonshme për të qenë në orar, për të qenë cilësisht të gatshëm për të adresuar problematikat, për të vazhduar thellimin e një procesi që për ne ka nisur”, tha Rama.
/Opinion.al
