Pesë persona grabitën kasafortën e një supermarketi në zonën e Yzberishtit me 26 shkurt të këtij viti.
I njejti grup dy ditë më parë kishte grabitur zyrat e një tjetër biznesi në kryeqytet.
Përpara një jave bastisën me armë një mobilieri në Vaqarr ku sërish morën kasafortën me një shumë parash. Për këtë grup numërohen të paktën 20 grabitje. Pjesë e rëndësishme e tij ishte ish-efektivi i policisë Engrid Hënaj. Ai ra sërish në pranga, vetëm 3 javë pasi kishte lënë qelinë pas arrestimit në shkurt të një viti më parë për dekonspirimin e aksioneve të uniformave blu në Kavajë.
Gjate marrjes në pyetje mësohet se Hënaj pranoi bashkëpunimin me grabitësit.
Ai cilësohet si njeriu që ka siguruar makinat që përdoreshin për grabitje në një kompani në zonën e ish- bllokut.
Kontrolli i GPS-ve të tyre, nga policia e Tiranës, çoi në dokumentimin grabitjeve nga të cilat 11 ne Tirane, 6 në Durrës, 1 në Kavajë dhe 2 në Berat. Shumica e grabitjeve kanë ndodhur në 2 vitet e fundit. GPS e makinave të marra me qira përkonin vendndodhjen e bizneseve të grabitura. Edhe disa karta telefonash celularë të këtij grupi, përputheshin me vendndodhjen e makinave.
Një tjetër provë e rëndësishme sipas hetuesve janë kampione të mbetjeve biologjike të gjetura nga ekspertët në vendin e ngjarjes. Pjesë e grupit ishte edhe 27-vjeçari Valmend Pelivani, 27 vjeç i dënuar më parë për vjedhje, i përfshirë edhe në një përplasje me armë në shkurt të këtij viti në një lokal në zonën e Tiranës së re.
