Duke i qëndruar deklaratave të 7 Tetorit 2010, Fatmir Xhafaj rikonfirmoi 3 ditë më parë, se “e ka ndihmuar vëllanë t’i rikthehet jetës normale, pa asnjë rekord negative përballë ligjit”.
Por Partia Demokratike tha se kjo nuk mund të arrihet , kur ai nuk ka bërë asnjë ditë nga dënimi dhe kur ka vazhduar të jetojë me paratë nga trafiku ndërkombëtar i drogës.
Partia Demokratike tha se është aksiomë se kur pasuritë e vëna përmes aktivitetit kriminal të trafikut të drogës nuk sekuestrohen, ato shërbejnë si burim financimi për vazhdimin e aktivitetit kriminal.
Prandaj PD i kërkoi Ministrit të Brendshëm, Fatmir Xhafaj, që t’i përgjigjej disa pyetjeve që bëjnë të gjithë:
1- A është rehabilituar Agron Xhafaj, edhe pse nuk ka bërë asnjë ditë burg nga dënimi i tij dhe pavarësisht se ndaj tij Fatmir Xhafaj ka zgjedhur të mos e zbatojë ligjin antimafia?
2- A bën ai një jetë normale dhe pa asnjë lloj rekordi negative përballë ligjit, siç ka garantuar publikisht Fatmir Xhafaj?
3- A e vazhdon Agron Xhafaj aktivitetin kriminal të drejtimit të organizatave kriminale të trafikut të paligjshëm të drogës?
4- A ka përgjegjësi ligjore, politike dhe morale Fatmir Xhafaj nëse Agron Xhafaj, pasi u bë “vëllai i Ministrit të Brendshëm”, koordinon veprimtarinë kriminale të trafikut të drogës në Shqipëri?
5- A është Agron Xhafaj një nga bosët e drogës në Shqipëri?
6- A i ka siguruar sot Fatmir Xhafaj paprekshmëri Agron Xhafajt, njëlloj siç bëri dje për dënimin e autoriteteve italiane?
7- A e ka Agron Xhafaj nën urdhra Policinë e Shtetit, si strukturë ndihmëse që i lehtëson veprimtarinë kriminale?/opinion.al
