Erjola Çocka iu drejtua emisionit “Stop” sepse ka marrë lejen e lindjes në Dhjetor të vitit 2017, por ende rezulton e punësuar, duke u privuar në këtë mënyrë nga paratë e sigurimve shoqërore.
“Kam punuar banakiere dhe kamariere në një lokal. Më 3 Dhjetor 2017 kam marrë lejen e paralindjes dhe më 1 Janar kam lindur djalin. Para se të lindja u drejtova të dorëzoj të gjithë dokumentet. Kur kam ardhur te sigurimet, kam kuptuar që figuroja në punë për muajin Dhjetor dhe Janar”, u shpreh e shqetësuar Erjola.
Në firmën private ku ka punuar pretendojnë që ia kanë bërë të gjitha dokumentet në rregull, ndërsa në zyrat e Institutit të Sigurimeve Shoqërore Durrës i kanë thënë që këto të dhëna kanë ardhur me vonesë nga ekonomisti i firmës.
“Duke parë që ekonomisti ia kalonte topin sigurimeve shoqërore dhe këta të fundit ekonomistit, nuk kisha ku të shkoja dhe iu drejtova emisionit “Stop”.
Gazetarja iu drejtua subjektit ku ka punuar Erjola për të komunikuar me pronarin në lidhje me këtë problem.
