Flamur dhe Lulzime Smakaj treguan në emisionin “Stop” historinë e tyre të pazakontë. “Emigruam në vitin ’99 drejt Anglisë. Atje lindëm dy fëmijë. Shteti anglez na i regjistroi me çertifikata, siç ishin ligjet atje. Ne jetuam 3 vite e gjysmë në Angli dhe na kthyen”, rrëfeu Flamur Smakaj.
Në vitin 2003 ata i janë drejtuar gjendjes civile për të regjistruar vajzat e tyre, Luljeta dhe Eltjona Smakajn, por iu tha se duhet të nisnin një proces gjyqësor. Gjykatësi i çështjes, pas disa seancash, u kërkoi të bënin analizën e ADN-së për të provuar që janë fëmijët e tyre, por sërish nuk i regjistruan si shtetase shqiptare.
Denoncuesi shtoi: “Na rrëzoi çështjen dhe tha nuk i regjistroj dot fëmijët. Nuk e dimë arsyen“.
Ndërsa bashkëshortja e tij tregoi prova që vërtetojnë që ajo është e ëma Luljetës dhe Eltjonës, siç janë certifikatat e lindjes në Angli, librat që janë regjistruar në spital, fotografi, si dhe analizën e ADN-së.
