Kryetari i opozitës Lulzim Basha ndodhet prej ditës së djeshme në Shkodër për të takuar nga afër banorët e zonave të përmbytura, tashmë nën ujë prej datës 5 Mars.
Duke vijuar në distancë retorikën me Kryeministrin Rama, i cili ishte shprehur në rrjetet sociale se pamjet e paraqitura nga mediat ishin të vitit 2011, Basha përmes një video përcjell shqetësimin në takimin me banorët, ndërsa shkruan: “Realiteti përtej propagandes. E vërteta përtej mashtrimit. Shkodranët nën ujë, të braktisur dhe të përbuzur nga Edi Rama”.
Prej ditësh tashmë cështja e banorëve të Shkodrës po nxjerr në pah përplasjen mes bashkisë dhe qeverisë, vecanërisht pas kërkesës së kryebashkiakes Voltana Ademi për shpalljen e gjendjes së jashtëzakonshme, gjë që qeveria vazhdon ta anashkalojë. / Opinion.al
