Kryetari i PD-së Lulzim Basha doli në një deklaratë për median për të kërkuar hetim të paanshëm dhe jo politik për Fran Frrokaj, kryetarin e Bashkisë së Lezhës, i zgjedhur nga Partia Demokratike në zgjedhjet e 2015.
“Shpresojmë dhe urojmë që Fran Frrokaj të jetë i pafajshëm. Kërkojmë që hetimi të jetë transparent, jo politik dhe i panashëm”- tha Basha.
Basha për Fran Frrokaj: Sot dua t’u them të gjithë shqiptarëve se ne urojmë që Fran Frrokaj të jetë i pafajshëm.
Nuk mund të ketë drejtësi nëse Dako, Tahiri, Ahmetaj, Sejdini dhe një grusht kryebashkiakësh të korruptuar të kësaj qeverie nuk do të dalin para drejtësisë.
Qëndrimi im dhe i PD-së është i pandryshuar: të gjithë duhet të jemi të barabartë para ligjit, por ne kërkojmë që hetimi të jetë transparent dhe i paanshëm.
Shqiptarët kërkojnë një drejtësi të pandikuar nga axhenda politike selektive të orientuara nga një krah politik drejt një krahu tjetër.
Fran Frrokaj është njëri prej 12 personave të arrestuar më 16 mars si të akuzuar për përfshirjen në skandalin e abuzimit të pronave në bregdetin e Lezhës.
Basha për komisionin hetimor për çështjen Tahiri
Partia Demokratike, të shtunën, ka bërë me dije kërkesat e saj mbi atë se çfarë do të kërkojë të hënën në takimin e parë të komisionit hetimor për çështjen e Saimir Tahirit, ish-ministrit të Brendshëm të dyshuar për lidhje me organizata kriminale të trafikut të drogës.
Përmes një deklarate për mediat nga selia blu, kreu i kësaj force politike, Lulzim Basha deklaroi se opozita do të kërkojë përgjigje të qartë për mënyrën e kriminalizimit të gjithë kupolës së Policisë së Shtetit, e cila u shndërrua në një organizatë kriminale ku askush nuk reagoi mbi atë se çfarë po ndodhte.
Basha tha se rënia e gjithë shtetit, pushoi së ekzistuari të gjitha institucionet ligjzbatuese, por interesi i PD-së është për të mësuar arsyen e rënies.
Sipas tij, për të mos lejuar kurrë më që kjo të ndodhë, pra që shteti nesër të kapet nga krimi.
“Bashkë me anëtarët e Komisionit Hetimor për çështjen “Tahiri”, – tha Basha nga selia blu, – kemi kryer sot konsultën e parë që i takon takimit të parë ditën e hënë. Në rastin e Saimir Tahirit, ra shteti, u shuan së ekzistuari të gjitha institucionet ligjzbatuese në vend. Qëllimi i komisionit është të zbardhë pse ndodhi dhe si ndodhi për të mos lejuar më kurrë që shteti të kapet nga krimi apo të kthehet në zgjatim të tij”,- tha Basha.
Kreu i PD-së, theksoi më të madhe interesin e opozitës për të mësuar arsyet që çuan në inkriminimin e gjithë strukturës së Policisë së Shtetit, e cila u shndërrua në një organizatë kriminale ku askush nuk reagoi.
“Paralelisht, Prokuroria duhet të hetojë grupin Habilaj dhe lidhjet e tij politike. Po bëhet presion shumë i madh politik për të mbyllur çështjen “Tahiri””,- u shpreh Basha të shtunën nga selia e PD-së./Opinion.al
