Pas skandalit, Skënderbeu mund Partizanin

Skënderbeu thelloi akoma më shumë diferencën me ndjekësit pas fitores 1 – 0 me Partizanin. Ekipi korçar është 13 pikë larg kur po luhet java e 21-të e Superligës. Partizani humbi sërish edhe pse në stol u ul Sulejman Starova, pasi u pagua për pjesën e mbetur të pezullimit.
Në fushë ishin edhe Batha dhe Trashi, por nuk mundën të ndihmonin ekipin e tyre. Ndeshja u vendos nga një autogol në minutën e 64’. Gojkoviç gaboi në kthimin e topit, duke befasur edhe portierin Hoxha. Kjo humbje e mban Partizanin 7 pikë larg zonës Europiane.
Pa gola përfundoi takimi Teuta – Flamurtari. 1 pikë me vlerë për skuadrën durrsake që ndodhet në zonën e rënies.
Kukësi fitoi 1 – 0 sfidën me Laçin në “Zeqir Ymeri”. Goli u realizua në minutën e 80’, kur kurbinasit ishin me 10 lojtarë për shkak të një kartoni të kuq. Shënues ishte gjeorgjiani Xharia.
Kamza i shkaktoi humbjen e radhës Lushnjes. Skuadra e Ramadan Ndreut fitoi me rezultatin 3 – 2 në transfertë. Të dielën do të zhvillohet takimi Luftëtari – Vllaznia, që u shty me një ditë pas sulmit ndaj trajnerit të ekipit shkodran Ernest Gjoka.
Tv Klan