Gigi Hadid ka reaguar në Twitter pasi shumë njerëz e kanë kritikuar për trupin. Modelja ka rënë në peshë ndjeshëm dhe kjo nuk i ka shpëtuar syrit të detajistëve. Për këtë, 22 vjeçarja ka postuar në Twitter një seri statusesh ku shpjegon ndryshimet në trupin e saj dhe shton që nuk do ta bëjë më këtë gjë.
Modelja ka zbuluar se vuan nga sëmundja e Hashimotos, një gjendje që prek gjendrrat e tiroideve dhe çon në shtim peshe, lodhje dhe lëkurë të thatë.
“Ju nuk e dini që kur fillova modelingun në moshën 17 vjeçare nuk isha diagnostikuar ende më sëmundjen e Hashimotos. Atëherë më thonit që isha shumë e shëndoshë, jasht parametrave për të pasur sukses në industri,” shkruan modelja në Twitter.
Ajo shpjegon në një status pasardhës që ka marrë mjekimin e duhur vitet e fundit për të rregulluar edhe metabolizmin, ndër simptomave të tjera të sëmundjes.
“Gjithmonë kam ngrënë njësoj, thjesht trupi im e përballon ndryshe tani që jam më e shëndetshme. Mund të jem “shumë e dobët” për ju dhe më besoni, nuk dua të jem, por ndihem më e shëndetshme dhe ende po mësohem me ndryshimet e trupit tim,” vazhdoi Hadid.
Modelja, e cila për momentin është ndër më aktivet në Javën e Modës, e mbylli deklaratën e saj duke thënë se kjo është hera e fundit që shpjegon trupin e saj, ashtu siç askush nuk duhet të bëjë vetëm se nuk përputhet me standartet e bukurisë./Opinion.al
