Një ngjarje e paprecedent nga ndodhur sot në mëngjes në Bashkinë e Dibrës. Në fillim u raportua se gjatë ndërhyrjes së policisë është shoqëruar edhe kryebashkiaku Muharrem Rama, por në një prononcim për News 24 kryebashkiaku me profesion kirurg tha se nuk ndodhet në polici por në spital ku po u jep ndihmën e parë të plagosurve përpara zyrës së tij. Sipas kryetarit të bashkisë, gjithçka ka nisur pasi janë pushuar nga puna, të punësuarit nga PDIU-ja në Bashkinë e Dibrës.
Ngjarja sipas Muharrem Ramës:
“Ka qenë ora 09:00. Nuk kisha mbërritur në zyrë, por më lajmëruan se kanë ardhur disa ekspontente të PDIU dhe kërkojnë të takojnë kryetarin. Ishin një grup prej 30 vetësh, përfaqësues PDIU-së dhe disa të punësuar nga PDIU në Bashki.Ato kanë protestuar sepse ne kemi larguar nga puna disa përfaqësues të PDIU-së me performancë të ulët. Pikërisht ata kanë ardhur sot dhe kanë dhunuar zyrat e bashkisë. Kane thyer dyert. Nga përleshjet janë 4 të lënduar me mjete të forta. Unë jam tek spitali i Peshkopisë duke u dhënë ndihmë të dëmtuarve. Janë dëmtuar në kokë me shkopinj bejsbolli dhe tuba hekuri. Ne do ndjekim vetem anën ligjore po kryen veprime hetimore për këtë ngjarje. Disa prej tyre janë shoqëruar nga policia”.
Ngjarja sipas gazetarëve lokalë:
12 persona mes tyre policë të bashkisë janë shoqëruar në komisariat pas sherrit me sende të forta brenda zyrave të bashkisë. Sherri ka nisur, pasi disa punonjës të shkarkuar nga puna kanë rrahur drejtorin e Burimeve Njerëzore, Drini Mataj me arsyen se është sjellë nga qytet tjetër për të larguar punonjësit e emëruar nga PDIU.
Pas sherrit mes punonjësve dhe drejtorit të ri me shqelma, grushte dhe sende të forta ndërhyri policia, ndërsa drejtori Drini Mataj është dërguar për mjekim në spital, pasi ka disa plagë në kokë, por jashtë rrezikut për jetën.
Po kështu i plagosur me sende të forta ka mbetur edhe shoferi i kryetarit të Bashkisë, Hektor Daci.
Autorët janë larguar nga bashkia pas sherrit, ndërsa të lënduarit po marrin ndihmën mjekësore në spitalin e Peshkopisë. Pranë tyre ndodhet edhe kryetari i bashkisë së Dibrës, Muharrem Rama.
Historia, si u zgjodh Muharrem Rama dhe pse u thye me PDIU
Në shtator në 2016, Bashkia e Dibrës shkoi në zgjedhje pasi u shkarkua Shukri Xhelili i përfshirë në skandal seksual. Përballë kandidatit të PD, Sherefedin Shehu, ishte mjeku Muharrem Rama i koalicionit (asokohe) qeverisës PS-LSI-PDIU. Pra Muharrem Rama fitoi me votat e këtyre 3 partive, ku thuhet se PDIU u investua shumë në fushatë.
Sakaq, shumë emërime në bashki u bënë pikërisht nga PDIU. Por pas prishjes së koaliconit në qendër (futja në zgjedhje vetëm e PS, PDIU, LSI në qershor 2017) punët nuk shkuan mirë as në bashkinë e Dibrës.
Kështu në nëntor 2017, deputetja e re e PDIU-së për Dibrën, Reme Lala akuzoi ashpër Muharrem Ramën nga foltorja e Parlamentit. “Bashkia Diber eshte inekzistente, Dibra eshte e paralizuar. Nje ose dy dite ne jave shkon kryetari i bashkise ne bashki nga 20 minuta, dhe atehere pasi te kete pire nja 5 dopio raki. Dhe ato pak shkresa qe firmosen qe jane ne interesat e kryetarit e rrethit te ngushte shoqeror te tij, jane te njollosura me yndyre qoftesh dhe te lagura nga rakia, sepse firmosen neper qepabtore”, do të shprehet Lala në parlament.
Në përgjigje të saj, Muharrem Rama do të shprehej: “Po i përgjigjem shkurt zonjushës Lala, të bijës së Ymer Lalës për të gjithë ju që e njihni, jo duke e sulmuar me të vetmin argument “SHPIFJEN” ashtu si ajo keq e nisi fjalimin e saj të parë e as duke u “MBROJTUR” për çka llogari do ti jap vetëm bashkëqytetarve të mi dhe askujt tjetër, por duke e këshilluar publikisht, meqënëse gjykoj se si e re që është në politikë, ka nevojë shumë !
Përpara se të nxjerrësh në pah hallet e Dibranëve që nuk janë as më shumë dhe as më pak nga problemet e të gjithë qytetarve në shumicën e bashkive të vëndit tonë, dhe fort në emër të tyre t’flasësh eja në Dibër sidomos Peshkopi meqënëse aty more edhe shumicën votave të tua.
Të këshilloj mos të flasësh në emër të së ashtëquajturës Parti tënde por ti referohesh gjithmonë votave personale ashtu si edhe vetë i quajte. Dhe e di pse, sepse në Dibër as nuk ka elektorat Çam dhe aq më pak votues që të njohin kauzat e shenjta do t’thoja të kësaj partie.
Mjaft i është marrë vota Dibranit me mashtrime e gënjeshtra, intriga e presione, me buk e kërbaç, mos i ngatërro edhe më këtë pjesë se nuk e meritojnë kaq shumë t’jua fyesh Inteligjencën”.
/Opinion.al
