Koha kur shqiptarët i përvetësonin trendet e veshjeve me vonesë tani i takon të shkuarës. Personazhet publikë tashmë shpenzojnë shifra të konsiderueshme për të patur direkt nga sfilita në garderobë veshjet e fundit. Madje edhe më herët se VIP-at hollivudianë. Por, duket se mania për të qenë gjithnjë në stilin e kohës ka bërë që të shohim fytyra të njohura që duken njësoj.
Siç dihet veshjet e përditshmërisë janë të pakrahasueshme për nga shpenzimet me ato të skenës. Fiksimi më i ri sipas “Jo vetëm modë” i këngëtareve tona janë çizmet 10 mijë dollarëshe të mbuluara me xhevahirë dhe të punuara me dorë, ku në secilën prej tyre numërohen 3.000 gurë zirkon. Sepse siç thotë shprehja: Kur e vesh Rihanna çdo veshje bëhet automatikisht e bukur. Pasi këngëtarja i veshi këto çizme, brenda natës u kthyen në trend.
Gjithashtu personazhe publikë shqiptarë ‘lanë kokën’ pas këtyre çizmeve, por jo të gjitha mund të vlerësojnë siç duhet të paturit e një versioni origjinal të tyre. Adelina Tahiri dukej kaq krenare kur në dhjetor veshi për herë të parë çizmet 10 mijë dollarëshe plot shkëlqim. Kohëve të fundit bukuroshja ka marrë dhurata shumë të kushtueshme nga bashkëshorti i saj dhe me gjasë këto çizme mund të jenë një blerje bujare e tij. Pak ditë më vonë edhe Enca do të reklamonte një palë çizme kopje me to, veçse jo origjinale. Imitimi i përpiktë i tyre kushton vetëm 85 dollarë, por nga fotot nuk dallojnë faje që janë një imitim.
Por përsa i takon blerjeve ‘të çmendura’, Blerim Destani qëndron në majë të klasifikimit. Ora e tij super ekskluzive “Richard Mille” kushton plot 725 mijë dollarë. Aktori nga Tetova është një prej 50 njerëzve të privilegjuar në të gjithë botën që kanë në pronësi një orë të tillë. Dukshëm Blerim Destani nuk pranon të mbajë në dorë asnjë orë që sigurohet lehtësisht. Pjesë e koleksionit të tij është edhe një tjetër orë që është prodhim i kufizuar dhe e kanë vetëm 30 njerëz në të gjithë botën.
Reperi Noizy duket se po përpiqet të sfidojë mikun e tij milioner Blerim Destani. Edhe ai ka një orë me vlerë rreth 114 mijë dollarë, punuar në ar dhe stolisur me gurë diamanti. I shpallur reperi më i paguar shqiptar Noizy e tregon me krenari në çdo foto blerjen e tij./tvklan.al
