Ish-kryeministri Sali Berisha të hënën pasdite nga foltorja e Kuvendit denoncoi një aferë korruptive në lidhje me inceneratorin e Elbasanit që kap vlerën 220 milion euro.
Berisha tha se po paraqes një rast flagrant, të vjedhjes së 220 milion eurove të vërtetuara. Ai u bëri thirrje deputetëve socialistë, t’i marrin këto dokumente dhe të thonë se cilën fjalë mund të justifikojnë.
Ish-kryeministri u përqëndrua më thellë tek afera, duke përmendur edhe emrin e personit që ka fituar nga ajo milionat e eurove.
Për të, kjo është një aferë më plehrë se çdo plehrë e Shqipërisë.
Sipas tij, në vitin 2015 një kompani ofrohet të ndërtojë djegësin e Elbasanit në kundërshtim me çdo ligj, ku qeveria brenda një dite, bëri nëntë veprime për t’i dhënë tenderin Klodian Zotos.
“Ky zotëri në 2016-ën e shet koncesionin me 16 milion euro një italiani dhe fut në xhep me një të rënë të lapsit 7 milion euro nga paratë e qytetarëve shqiptarë. Këta vjedhin si ujqër të tërbuar, po ku ngopen ata”,-tha Berisha në Kuvend.
Sipas tij, ai që e jep pa bërë një punë, pa hedhur një kanal, 6 milion euro vjedhje, ai i ndan paratë me kryeministrin.
Ai tha se në Tiranë djegësi do të jetë 128 milion euro, ndërsa kontratën askush nuk e gjen dot; pasi ajo nuk ekziston.
“Secili mund të thotë përderisa nuk ekziston kontrata, pse flet? Unë e di që ekziston. A vidhet në këtë mënyrë more zotëri, po ja kjo është gjëja e paimagjinueshme”,-u shpreh Berisha.
Ish-kryeministri deklaroi se këta janë një bandë dhe këtu është ministri i mjedisit Lefter Koka që ka marrë pjesën e vet.
Sipas tij, Lefter Koka se bënte dot kurrë një gjë të tillë, pasi financat nuk i ka Lefter Koka.
Berisha u bëri thirrje deputetëve socialistë të reagojnë, sepse; “burrat nuk lidhen pas mandatit, si qeni pas hurit”.
Për atë, deputetët, duhet të flasin se përfaqësojnë qytetarët me halle në mbarë Shqipërinë.
“Ne sigurisht këto do i cojmë aty ku duhet, por është në nderin tuaj që si parlamentarë t’i shihni”,-tha Berisha.
Gjatë fjalës së tij në Kuvend, ish-kryeministri u ndal edhe tek situata e përmbytjeve në vend, ndërsa deklaroi shpalljen e emergjencës dhe dëmshpërblimin për të gjithë të përmbyturit.
Ai tha se ka një qëndrim cinik, por përgëzon të gjithë ata që kanë ndihmuar të përmbyturit.
Megjithatë në lidhje me situatën e krijuar në vend, duhet një qëndrim moral, ata që i ka përmbytur Vjosa duhet t’i dëmshpërblejë shteti.
“Për t’i shpërblyer ata qeveria duhet të shpallë gjendjen emergjente. Përndryshe qeveria vjedh dhe vetëm vjedh ndihmat e tyre”, -u shpreh Berisha./Opinion.al
