Ardit Gjebrea prej shumë vitesh ka hequr dorë nga muzika, duke ju përkushtuar vetëm moderimit. E kemi parë nën drejtimin e “Të dielës shqiptare” dhe “Kënga Magjike”, por pas 13 vitesh Gjebrea i rikthehet dashurisë së vjetër, muzikës. Ai ka postuar një foto në Instagram ku ndodhet në studion e Darko Dimitrov dhe ka treguar se po realizon një këngë duet me vajzën e tij Anna.
“Në studion e Darko Dimitrov”, shkruan Gjebrea, “Sepse këtë herë i rikthehem dashurisë: këngës, me një duet. E me kë tjetër? Me Anna Gjebrean!”- shkruan Arditi në postimin e tij.
Hera e fundit që Arditi ka sjellë një këngë për publikun ka qenë me këngën “Ja ku jam”, ndërsa albumi i tij i fundit është publikuar në vitin 2004. Në vitet 90 Gjebrea ishte një prej këngëtarëve më të dashur i cili prezantoi shumë këngë të kthyera në hite. Anna, vajza e tij 8-vjeçare duket se e ka trashëguar më së miri talentin e babait të saj në muzikë, pasi ajo di të këndojë shumë bukur, dhe është aktive në eventet muzikore në shkollën e saj. Duket se kënga e re e Arditit do të prezantohet në netët e “Kënga Magjike” në datat 6,7 dhe 9 dhjetor.
