Policia e Tiranës ka njoftuar sot se mbrëmjen e djeshme është arrestuar teksa tentonte të largohej nga Shqipëria, një shtetas turk i shoqëruar nga dy fëmijët dhe bashkëshortja e tij.
Në njoftimin e policisë thuhet se shtetasi me inicialet M.A dhe bashkëshortja e tij me inicialet N.A janë ndaluar në Rinas teksa përpiqeshin të largoheshin nga vendi me pasaporta të falsifikuara si shtetas serbë.
“Më datë 11.11.2017, rreth orës 21:00, u arrestua në flagrancë shtetasit turk, M.A dhe u referuan materialet në Prokurorinë e Rrethit Gjyqësor Tiranë, për bashkëshorten, N.A, vjeç 37 e 36, banues në Turqi, pasi rreth orës 15:30, në PKK Rinas, me tre fëmijët e mitur, u kapën duke tentuar të kalojnë kufirin me pasaporta serbe të falsifikuara. Në cilësinë e provës materiale u bllokuan 5 pasaporta serbe të falsifikuara dhe një sasi eurosh. Nenet 189 e 298 të Kodit Penal”.
Por të dhënat e mësipërme dhe inicialet e të ndaluarve përputhen me identitetin e profesorit Gylenist Muhammet Yasir Aydogmus dhe bashkëshortes së tij Nermin Aydogmus, të ndaluar në Shqipëri bashkë me fëmijët e tyre, teksa në fillim të tetorit përpiqeshin të largoheshin drejt Italisë në portin e Durrësit.
Gjykata e Durrësit i la ata të lirë pas një sugjerimi të dërguar nga autoritetet e Bashkimit Europian, por në një proces të mbajtur dy ditë më parë, gjykata ka kërkuar ndalimin e tyre.
Shteti turk ka nxjerrë një urdhër arresti për profesorin e konsideruar si kundërshtar të Erdogan, ndërsa ky i fundit ka paraqitur një kërkesë ndaj shtetit shqiptar për azil.
Lirimi i turkut në sallën e gjyqit në procesin e pak javëve më parë hodhi dyshime se mund të ndikonte në raportet e Ramës me presidentin turk Erdogan, ndërkohë që tashmë pas ndalimit , pritet dorëzimi i pedagogut tek autoritetet turke.
Gjithe faktet te cojne te besosh se eshte pikerisht ai i ndaluari i policise, ndonese ne komunikate nuk jepen detaje mbi kete fakt. / Opinion.al
