Me sa duket telashet nuk paskan të mbaruar për ish-ministrin e Brendshëm Saimir Tahiri. Në fakt mbetet ende pikëpyetje a janë problemet ato që po ndjekin deputetin apo pasoja të gabimeve të tij.
Policia e Elbasanit ka ndaluar dy ditë më parë qytetarin Orest Sota, në makinën e të cilit u gjendën 800 mijë euro dhe dy patenta në emër të ish-ministrit Tahiri.
Ngjarja u denoncua fillimisht nga kreu i opozitës Lulzim Basha, ndërsa policia e Elbasanit reagoi më vonë, duke konfirmuar ndalimin e biznesmenit Sota, por pa përmendur dy patentat. Në njoftimin e policisë nuk saktësohet as vlera e parave të gjetura në mjetin e biznesmenit,por përmendet që bëhet fjalë për një vlerë të madhe parash.
Ndërkohë, mediat kanë publikuar foto të patentave të Tahirit të gjetura në automjetin e Sotës dhe thuhet se janë të dyja patenta për leje drejtimi të mjeteve lundruese, lëshuar nga porti I Durrësit në vitin 2017. Ndonëse këto detaje mbeten të pakonfirmuara nga policia, mësohet se I ndaluari Sota ka shpjeguar në polici edhe lidhjen me ish-Ministrin.
Ai është shprehur se ka raporte miqësie me shoferin e Tahirit dhe se ky i fundit I ka harruar në makinën e tij të dyja patentat. Sa për shumën e madhe të parave, ai ka deklaruar se I ka marr nga I ati për të blerë hekur në Elbasan.
Deri në zbardhje të gjithë këtyre deklaratave duket pak e vështirë të kuptohet se çfarë kërkonin patentat e Tahirit pranë 800 mijë eurove. Nëse kujtojmë që patenta është një dokument krejtësisht privat në përdorim, po kaq e çuditshme duket që shoferi të ketë patentën e shefit, aq më tepër të një mjeti lundrues.
Kujtojmë që ish-ministri ka mohuar të jetë posedues I ndonjë mjeti të tillë. E nëse kujtojmë edhe faktin, që pak ditë më parë Prokuroria ka bërë kontroll në shtëpinë e Tahirit, situate sërish nuk duket e favorshme për ish-ministrin. Ndoshta Tahiri duhet të dalë sërish e të japë një shpjegim. /Opinion.al
