Kryetari i Bashkisë së Lezhës, Fran Frrokaj deklaron se nuk ka asnjë konflikt dhe nuk e lidh ngjarjen e sotme me individë apo ngjarje specifike. Reagimi i tij vjen pas djegies së makinës gjatë natës në një parking publik në qytetin e Lezhës.
Duke folur për Opinion.al, kryebashkiaku i Lezhës deklaroi se “ngjarja ka ndodhur rreth orës 01:00 të ditës së sotme”. Makina me të cilin ai udhëtonte, por që drejtohej nga shoferi i bashkisë ka qenë e parkuar në një parking publik. “Nuk jam i qartë nëse kemi të bëjmë me zjarrvënie të qëllimshme apo aksidentale”, tha ai, duke kërkuar që ngjarja të zbardhet shpejt nga prokuroria dhe policia.
“Jam njoftuar në mesnatë për djegien e makinës. Aty në fakt janë djegur dy makina, e imja dhe një tjetër e parkuar pranë saj”, tha Frrokaj për Opinion.al, duke shtuar se ka dhënë edhe dëshminë në polici.
“Siç më tha shoferi, automjeti pardje kishte patur një defekt në llampë. Gjithsesi janë organet kompetente që do ta zbardhin shkakun, pasi mund të jetë edhe zjarrvënie e qëllimshme. Unë nuk kam patur asnjë kërcënim në lidhje me detyrën dhe as konflikte personale por kjo nuk e përjashton mundësinë që të jetë ndonjë qejfmbetje e vogël periferike”, vijoi ai.
“Makina ishte marrë me kontratë nga një individ dhe përdorej për llogari të bashkisë së Lezhës. Unë shpresoj që kjo ngjarje të zbardhet sa më shpejt”, përfundoi Frrokaj në reagimin e tij për Opinion.al.
Sakaq policia e Lezhës, mëngjesin e sotëm informoi se dy makina u dogjën pak pas mesnatenë parkingun e jashtëm të një pallati në lagjen Besëlidhja të Lezhës. “Rezulton se janë përfshirë nga flakët dy automjete të parkuara afër njëra – tjetrës , dhe konkretisht automjeti Mercedes Fuoristradë ML me targë AA 400 JK në pronësi të një gruaje me iniciale Sh.P. dhe në përdorim nga shtetasi F.F. Po kështu është djegur mjeti Mercedes Benz me targë LE 7495 E në pronësi të shtetasit K.Ll”, njofton policia.
Grupi hetimor po vijon kryerjen e veprimeve në vendngjarje.
Janë marrë disa deklarime si dhe po bëhet këqyrja e kamerave përgjatë rrugës dhe në afërsi të vendit të ngjarjes me qëllim sqarimin e plotë të rrethanave të ngjarjes.
Gjithashtu po bëhet vlerësimi i rastit nga eksperti piroteknik me qëllim përcaktimin e shkakut të rënies së zjarrit, thuhet në njoftimin e policisë.
Njoftimi zyrtar i bashkisë
Bashkia Lezhë sqaron opinionin publik se, automjeti i djegur Autoveturë, tip Mercedez Benz me targa AA 400 JK, prodhim i vitit 2002, ishte marrë nga bashkia me ‘’Kontratë Huapërdorje’’ për shkak se nuk kishte në pronësi makinë për lëvizjen e kryetarit apo administratës. Bashkia Lezhë po pret përfundimin e hetimeve për të zbardhur shkaqet e djegies ndërsa i bën thirrje organeve kompetente për të hedhur dritë mbi këtë rast, nësë ishte zjarrvënie e qëllimshme apo defekt në automjet.
/R. Dedaj – Opinion.al
