Garancitë bankare për Bonuçin dhe Biljan vazhdojnë të jenë në qendër të vëmendjes së mediave, pasi afati për pagesën e tyre, që korrespondon me 20 për qind të shumës së kartonit, skadon më 11 gusht. Ditët e fundit, klubi i Milanit është munduar të sigurojë garantin për sa u përket pagesave për dy futbollistët e blerë respektivisht nga Juventusi dhe Lacio.
Refuzimi i huasë së kërkuar nga Milani ka ardhur nga Banka Popullore e Milanos që është edhe sponsor i kuqezinjve deri më 30 qershor 2019. Kjo përgjigje negative vjen si pasojë e bilancit negativ që Milani ka pasur në vitet e fundit. Duhet theksuar se sistemi i kredive, për nga mënyra e funksionimit, pengon sigurimin e huasë bankare për çdo shoqëri biznesi që paraqet një bilanc ku fitimet janë më të pakta sesa shpenzimet.
Milani dhe shumë klube të tjera të Serisë A prej vitesh përballen me këtë problem, i cili ngadalëson federimin e futbollistëve. Lëvizja e radhës për të siguruar garancinë do të jetë “penglënia” e një aseti që mund të fillojë që nga lejimi i përdorimit të stemës së klubit e deri te lënia peng e vetë lojtarit. Në një rast ekstrem ku Milani nuk do të shlyente detyrimin, kartoni i futbollistit do t’i përkiste bankës që ka lëshuar huanë. Disa prej futbollistëve të ardhur gjatë merkatos së kësaj vere dhe të drejtat televizive për sezonin e ri janë një garanci që Jonghong Li i ka dhënë grupit “Elliot” nga të cilët siguroi një pjesë të parave për të blerë aksionet e Milanit, ndaj klubi nuk mund t’i përdorë si pengje për të tjera kredi. Banka Popullore e Milanos, që ka refuzuar garancinë, u ka dhënë kuqezinjve dy rrugëzgjidhje, që janë: 1. Lirimi i ndonjë aseti nga ato që i janë dhënë peng shoqërisë “Eliot” për ta përdorur si kundër-garanci pranë kësaj banke. 2. Gjetja e një banke ndërkombëtare që të sigurojë kundërgarancinë e nevojshme për të regjistruar Bonuçin dhe Biljan. PRECEDENTI Një situatë të ngjashme me këtë që po përjeton Milani e ka përjetuar edhe Reali i Madridit. Në fakt, në vitin 2009 presidenti Florentino Perez nuk kishte probleme federimi, por për të siguruar një kredi prej 76.5 milionë eurosh vendosi si peng Kristiano Ronaldon dhe brazilianin Kaka. Mediat në atë kohë arritën të hipotetizonin një falimentim të “Los Blancos” me dyshen e yjeve që do të kalonin si asete në pronësi të bankës që miratoi kredinë në fjalë.
