Nuk e ka përballuar dot izolimin në qeli, 18-vjeçari i jep fund jetës në Burgun Shënkollit.
Burime të Policisë bënë të ditur se Albi Luka nga Fushë- Kruja u gjet pa ndjenja brenda ambienteve të qelisë së burgut. Kanë qenë gardianët, të cilët konstatuan ngjarjen dhe më pas ai është dërguar me urgjencë drejt spitalit të Lezhës, por bluzat e bardha bënë të ditur se ai mbërriti pa shenja jete.
Në lidhje me ngjarjen kanë nisur hetimet, ndërkohë dyshimet janë se i riu mund t’i ketë dhënë fund jetës duke u vetëhelmuar me gaz të lëngshëm brenda ambienteve të qelisë. Gjithsesi do të jetë ekspertiza mjekoligjore, e cila do të zbardhë shkaqet e vdekjes së 18-vjeçarit.
Ai mësohet se ishte arrestuar një muaj më parë nga policia e Krujës për veprën penale të vjedhjes dhe ishte në pritje të dënimit nga gjykata.
Paraprakisht dyshohet se i riu ka qenë në kushtet e tronditjes së fortë psikologjike në momentin e kryerjes së aktit vetëvrasës, për shkak se ai nuk e ka përballuar dot izolimin. Frika se gjykata do ta dënonte, ka bërë që 18-vjeçari të shfaqte shenja të depresionit, çka sipas burimeve është konfirmuar edhe nga persona të tjerë që kanë qenë në kontakt ditët e fundit me të.
“Albi Luka është gjetur thuajse pa shenja jete në qeli. Ai është dërguar menjëherë në spital, por mjekët nuk kanë arritur dot ta shpëtojnë”, u shprehën burime të Policisë së Lezhës.
Pas ngjarjes, një grup hetimor ka mbërritur dje në Burgun e Shënkollit ku është kryer këqyrja e vendit. Gjithashtu janë marrë në pyetje disa të burgosur të tjerë, të cilët kanë pasur kontakte me 18-vjeçarin ditët e fundit.
Sipas burimeve, ata janë shprehur se kishin vënë re shenja mërzie dhe mbylljeje tek i riu, por nuk kanë menduar se ai mund të vetëvritej. Trupi i tij i është nënshtruar ekspertizës përkatëse mjekoligjore, nga ku do të përcaktohet edhe shkaku i vdekjes.
Mjekët konfirmuan se i riu kishte mbërritur thuajse pa shenja jete dhe, me gjithë ndërhyrjen e tyre, nuk u arrit që të shpëtohej. Familjarët e tij janë sinjalizuar për ngjarjen, ndërsa policia konfirmoi se është duke hetuar për të përcaktuar shkakun e kësaj ngjarjeje të rëndë brenda ambienteve të Burgut të Shënkollit.
Burimi: Panorama
