Dy orë pasi kishte nisur protesta e shoqërisë civile përpara Torrës Veneciane për mbrojtjen e trashëgimisë arkeologjike të Durrësit, midis dy grupimeve: shoqëri civile- Forumi Rinor i PD, pati një konflikit që degjeneroi deri në përplasje fizike midis tyre.
Disa djem të Forumit Rinor dyshohet se kanë ngacmuar një vajzë nga grupi i shoqërisë civile. Kjo bëri që midis tyre të ketë jo vetëm debat, por edhe përplasje fizike që përfundoi me denoncim në polici, raporton portali “Durresi Lajm”. Sherri bëri që protesta të dështojë.
Një numër i konsiderueshëm personash shkuan në komisariatin e policisë së Durrësit për të denoncuar ngjarjen, ndërsa uniformat blu kanë nisur hetimet për këtë rast.
Aktivistja Lorisa Ylli, ka reaguar me anë të një statusi në “Facebook”, ku shprehet se “një grup që i bashkua protestës së mbrëmjes së djeshme, në fakt kishte qëllimin e vetëm për të shkatërruar frymën e protestes dhe kauzës së tyre qytetare duke rrahur një vajzë dhe një djalë i cili u vendos në mbrojtje”.
