Katër ministra të PS, përkatësisht, Saimir Tahiri, Ilir Beqaj, Blendi Klosi dhe Bledi Çuçi nuk janë më pjesë e kabinetit ‘Rama’. Largimi i tyre është përforlur prej dy ditësh në media, por sot u konfirmuar zyrtarisht nga kreu i Qeverisë.
Në atë që e quan “komunikimi i javës në facebook”, Rama ka folur shkurt për ndryshimet në qeveri duke lavdëruar ministrat e saposhkarkuar. Por Rama nuk ka bërë të ditur se kush do të jenë pasuesit e tyre. Ai është kujdesur tu bëjë të ditur qytetarëve se nuk ka qenë Ilir Meta apo çadra e protestës së PD që e kanë detyruar të bëjë këto ndryshime në kabinet. Sipas Ramës, ministrat e shkarkuar do të jenë në krye të punëve gjatë fushatës elektorale.
Fjala e Ramës për shkarkimin e ministrave
“24 orët e fundit keni dëgjuar turlilloj teorish konspirative për ndryshimet në qeveri. Tani ua shpjegoj unë. Këto ndryshime nuk ka në asnjë lloj lidhje me lajmet që jepen nga zyra këtu poshtë zyrës sime (çadra e protestës). Nuk kanë lidhje as me deputetët e PD që zihen për figurantët që mbushin çadrën. S’kanë lidhje as me muzikën që mbush çadrën bosh gjatë gjithë ditës.
Ndryshimet janë politike. Do të jenë 4 nga radhët e PS. Ndryshimet nuk nxiten nga puna, ata largohen me rezultatet më pozitive. Saimir Tahiri ka qenë kampioni ynë që i ndryshoi fytyrën policisë së shtetit. Duke vazhduar me Blendi Klosin, i cili e çoi përpara me përkushtim e me rezultate të lavdërueshme, stafetën e marrë nga Erion Veliaj në ministrinë e Mirëqenies Sociale dhe të Rinisë. Me tej me Ilir Beqajn i cili u godit pa pushim me baltën e akuzave të shpifjeve të opozitës mbështetur e ushqyer nga lobistët e firmave farmaceutike që humbën pushtetin e tyre korruptiv mbi sistemin e shëndetësisë, ku pa asnjë diskutim ministri ka bërë ndryshime që 3 vjet e gjysëm më parë as nuk mund të mendoheshin. Në fund, por jo për nga rëndësia me Bledi Çuçin që udhëhoqi dhe koordinoi bashkë me Bashkim Finon, reformën historike administrative territoriale.
Së katërti ndryshimet nuk lidhen me ndonjë kërkesë të caktuar të bashkëkryetarit Ilir Meta, i cili ka respektuar dhe ka mbështetur që ditën e parë rolin tim kushtetues si kryeministër në caktimin apo lirimin e ministrave pa asnjë dallim.
Së pesti ndryshimet e qeverisë nuk reflektojnë asgjë tjetër përveçse domosdoshmërinë që udhëheqësit tanë politikë të fushatës së 18 qershorit të fokusohen me energji të reja dhe prani të vazhdueshme pranë njerëzve në përballimin e volumit të jashtëzakonshëm të kontakteve me njerëzit që kërkon kjo fushatë. Duke nisur nga Tirana, ku Saimir Tahiri është kryetari i partisë tonë dhe ambicja jonë është të ngrihemi mbi rëezultatin e fitores shembullore të 2013.
I bëj sot thirrje të gjithë socialistëve dhe mbështetësve të PS, të lidershipit, skuadrës të programit tonë të reformave të thella që bëjnë shtet të ngrihen në këmbë dhe të trokasin derë më derë pa pushim për të hapur siparin e një beteje të re për Shqipërinë e Gjeneratës tjetër. Muzika le të vazhdojë karvani do të shkojë përpara”.
/Opinion.al
