Pasditen e djeshme parlamenti u mblodh por nuk votoi ngritjen e komisioneve të Vetingut dhe kjo jo për shkak se mungonte opozita, por se nuk kishte kandidatë të mjaftueshëm. Këtë e tha vetë, Gramoz Ruçi, teksa nga foltorja e Parlamentit deklaroi se urdhërohet Avokati i Popullit të hapë edhe njëherë procedurën për aplikimin e kandidatëve. Pra Vetingu kthehet në pikën 0. Është lënë një afat 7-ditor për dorëzimin e kandidaturave, shkruan Opinion.al
Gramoz Ruçi PS: Në parlament erdhën 21 kandidatë për 28 vende. Erdhi edhe një listë e dytë me emra që nuk plotësojnë kriteret për mungesë dokumentacioni. Kështu që komisioni që do ngrinte parlamenti do kishte vetëm 21 kandidatë për 28 vende. Ndaj ne nuk e pamë të arsyeshme që të bëhej votimi sot.
Vasilika Hysi PS: Numri i madh i aplikantëve ka bërë që verifikimi i kritereve nga ana e Avokatit të Popullit të mos ishte ai që duhet. Nuk është as lapsus dhe as shkelje e Kushtetutës, kthimin i procesit tek Avokati i Popullit.
Oerd Bylykbashi PD: Vendimi i marrë dje në Parlament është në shkelje të Kushtetutës. Nuk ka një dispozitë ligjore për shtyrjen e afateve. Pra kush i përcakton afatet e reja dhe kush e përcakton nëse është Presidenti apo Avokati i Popullit, institucioni që mbledh kandidaturat?
Por le të marrim si të mirëqenë vendimin e djeshëm të mazhorancës edhe pse opozita e konteston. Për shkak të shtyrjes së afateve, ka shumë gjasa që Vetingu të mos mund të votohet nga ky parlament për faktin se legjislatura mbyllet në Maj, ndërsa gjithë procesi i përzgjedhjes së organeve të reja të vetingut shkon në fund të Qershorit. Kujtojmë se me 18 qershor kemi zgjedhjet e përgjithshme parlamentare, shkruan Opinion.al
***
Afatet për Avokatin e Popullit dhe ONM
Referuar vendimit të Kuvendit, nga data 7 mars deri në datën 14 mars, Avokati i Popullit do të administrojë aplikimet e reja për të shërbyer në organet e Vetingut.
Brenda 7 ditëve nga përfundimi i procesit të aplikimit, pra deri në datën 21 Mars, Avokati Popullit, në konsultim me vëzhguesit ndërkombëtar të ONM, përpilon një listë të re me kandidatët të cilët plotësojnë kriteret formale për secilin pozicion dhe një listë me kandidatët të cilët nuk i plotësojnë këto kritere. Më tej, një komision i përbërë nga të paktën tre përfaqësues të Operacionit
Ndërkombëtar të Monitorimit vlerëson kandidatët brenda 14 ditëve.
Pra, dt 4 prill është afati i fundit që ONM duhet t’i dorëzojë Avokatit të Popullit zarfin me listën me kandidatët të cilët kanë marrë vlerësime pozitive apo negative. Avokati i Popullit ia përcjell listën menjëherë Kuvendit.
Afatet për Kuvendin
Kuvendi, brenda tre ditësh nga marrja e listës së kandidatëve, pra brenda datës 7 prill, miraton krijimin dhe përbërjen e një komisioni ad hoc me gjashtë anëtarë (3 opozitë dhe 3 mazhorancë) për vlerësimin e kandidatëve.
Brenda dhjetë ditëve nga krijimi i tij, komisioni ad hoc i përcjell listën e hartuar sipas procedurave, Kuvendit. Lista duhet të paraqitet brenda datës 17 prill. Kuvendi, brenda 10 ditëve nga marrja e listës së kandidatëve, të cilët i plotësojnë kriteret formale, listës së kandidatëve, të cilët nuk i plotësojnë kriteret formale, dhe listës së rekomandimeve të ONM, miraton krijimin dhe përbërjen e dy komisioneve ad hoc të përzgjedhjes.
Brenda 30 ditëve, pra brenda datës 27 Maj, nga konstituimi i tij, komisioni ad hoc i përzgjedhjes, zhvillon procedurën për votimin e kandidatëve. Në mbledhjen e parë të secilit komision ad hoc përzgjedhës miratohet kalendari i zhvillimit të seancave dëgjimore me kandidatët, si dhe ngarkohet Sekretari i Përgjithshëm i Kuvendit për njoftimin e kandidatëve. Brenda 10 ditëve, pra brenda datës 6 qershor, Kuvendi duhet të miratojë listën e kandidatëve në bllok me 3/5 e votave të të gjithë anëtarëve.
Por, nëse Kuvendi nuk e miraton listën e kandidatëve në bllok, Kryetari i Kuvendit ia kthen atë komisioneve ad hoc për përsëritjen e procesit të përzgjedhjes dhe për dërgimin e një liste të dytë brenda 10 ditëve, pra brenda datës 16 qershor. Kuvendi, brenda 10 ditëve, pra brenda datës 26 qershor, nga dërgimi i listës së dytë, mund ta rrëzojë në bllok listën e kandidatëve me 2/3 e të gjithë anëtarëve të tij. Në rast se lista nuk rrëzohet, kandidatët e përzgjedhur konsiderohen të zgjedhur.
/Opinion.al
