Historia e Zharrëzës sipas Kryeministrit Rama tregoi edhe njëherë se njerëzit që kanë halle kanë vetëm një aleat në këtë vend, qeverinë. Duke folur në Parlament, ai deklaroi se “përtej retorikave dhe shfaqjeve, që janë qëllime të ulëta, problemin e trajtoi kjo qeveri. Kjo qeveri që ndaloi injektimet e ujit teknologjik që fundvitin e shkuar, sapo u shfaq problemi”.
Ai ka theksuar se, ishte sërish kjo qeveri që ndërmori gjithë procesin e rivlerësimit të dëmeve dhe shumica dërrmuese e atyre që dolën në protestë ishin duke plotësuar formularët.
“Ndërkohë që disa tutorë politikë dhe aktivistë me demek, që vijnë nga skandali i korrupsionit dhe zullumeve në industrinë e naftës, morën peng atje 7 vetë dhe nuk i linin të iknin. Mua më thoshin fol me avokatin e tyre. Me kë avokat? Avokatin tutor që i mori zvarrë deri në Tiranë? Ishte një mizanskenë e ngritur mbi një hall të madh dhe me njerëz me plot të drejtë të dëshpëruar”, ka thënë Rama.
Nga ana tjetër, ka shtuar ai, nëse ka një qeveri që ka vënë nën kontroll sektorin e naftës është kjo qeveri. “Ne kemi imponuar ndaj Bankers një seri detyrimesh, duke i vënë para përgjegjësisë për një sërë aspektesh. Nga viti 2014, buxheti i shtetit merr 40 milionë dollarë më shumë”, ka shtuar Kryeministri.
Ndërkohë ka reaguar avokati i banorëve Adriatik Lapaj i cili përmes një statusi në facebook shkruan: “Nuk i vë dot faj Kryeministrit që nuk e di se pengmarrja është veper e rende penale. Nese une si pengmarres lihem i lire rrugeve atehere prape lartmadherisë i del llogaria gabim se i bie qe nuk paska fare masa mbrojtese per qytetaret. Zotëri merru me punë e leri historite me Piter Panin se po te qe si thua nuk do dilte VKM dhe dy Urdhera? Merru te zbatosh ato qe u firmosen dje, kete bej”.
