Partia Demokratike ka mbajtur sot në Tiranë protestën e paralajmëruar kundër qeverisë, të cilën përgjatë dy javëve të fundit e ka cilësuar edhe si ditën ku shqiptarët morën një vendim të madh.
Ndërkohë që po punohet për vendosjen e çadrave, protestuesit janë ulur në shesh para Kryeministrisë, duke iu përgjigjur vendimit të Bashës për të qëndruar aty deri në shporrjen e qeverisë Rama.
Pas mbylljes së fjalës e pasi Basha ka shpallur vendimin e madh për të qëndruar në shesh, deri në “shporrjen e qeverisë, sigurimin e zgjedhjeve të lira me krijimin e qeverisë teknike”, bëhet gati ngritja e çadrave, sipas planit të PD-së.
Basha ulet këmbëkryq në bulevard me protestuesit.
Basha deklaroi nëse nuk garantohen zgjedhje të lira dhe të ndershme, nuk do ketë zgjedhje me 21 qershor 2017.
Kreu i PD-së e ka quajtur protestën e sotme të opozitës si bashkimin më të madh popullor që ka njohur ndonjëherë ky vend dhe që është derdhur në sheshin e lirisë, të protestës të vendimit të madh për Shqipërinë dhe gjithë shqiptarët.
“Duam zgjedhje të lira e të ndershme, dinjitet, drejtësi, punë, ta vëmë interesin e njerëzve të thjeshtë të parin, të ardhme dinjitoze, duam shpresën, që po lind nga ky bashkim i madh në historinë e shqiptarëve”.
Basha tha se jemi të bashkuar dhe nuk e pranojmë dot më këtë gjendje, pasi kemi besimin se mund të ndërtojmë një jetë dinjitoze, jemi të bashkuar nga alarmi ndërkombëtar se kur shteti i korruptuar dhe kriminel kërkon të vjedhe zgjedhjet e ardhshme, jemi bashkuar për të marrë një vendim të madh.
“Për të ndalur maskaradën e grabitjes së zgjedhjeve, ose zgjedhje të lira, ose zgjedhje nuk do të ketë. Rrugë të mesme nuk ka, rrugë tjetër nuk ka, zgjedhjet për fasadë, të njollosura nuk do ti pranojmë”, theksoi Basha.
Kreu demokrat bëri me dije se zgjedhjet e standardeve të krimeve nuk do t’i pranojmë, zgjedhje me kriminelë të veshur me pushtet nuk do t’i pranojmë, që shtrembërojnë vullnetin tuaj nuk do të ketë më në Shqipëri.
