Prof. dr. Fatos Tartari ka qenë në krye të protestave qytetare kundër punimeve në sheshin ‘Veliera’, përballë Torres Veneciane në Durrës. Për arkeologun, situata e krijuar ngjan me atë të vitit 1997, pasi politika ka bashkëpunuar me krimin e organizuar dhe mafian e ndërtimit. Në një intervistë për Gazetën Shqiptare, Tartari thotë se është e qartë që punimet po kryhen mbi rrënojat e vërteta të Dyrrahut.
Çfarë i ka mbetur Durrësit tani?
Vetëm këndi arkeologjik tek Torra Veneciane. Të gjitha ligjet që formuan statusin e veçantë të Durrësit u shkelën për t’i lënë vend këtij ndërtimi kaotik e rrënues, që po përjeton qyteti nga dita në ditë e nga viti në vit. Politika nuk mund ta bënte këtë pa bashkëpunuar me krimin e organizuar dhe mafien e fushës së ndërtimit. Duke u nisur nga fitimet marramendëse, Durrësin e kthyen në një qytet fshatarësh, ose me urbanizim fshataresk. Durrësi në vend që të ishte qytet model i turizmit arkeologjik, është kthyer në një qendër fshatareske, që nuk i shërben më askujt.
Këto ditë keni qenë në ballë të protestave që po zhvillohen për sheshin “Veliera”. Deklaruat se u prish këndi i fundit arkeologjik i Durrësit.
Është porta e detit e “Jallisë”, kjo dëshmohet edhe nga fotografitë që disponojmë. Gjurmët e vërteta e rrënojat e vërteta, bashkia po i prish me duart e veta.
Cili është apeli juan profesor?
Marr shkas nga protesta e fundit që bëri një grup qytetarësh dhe i përshëndes. U bëj thirrje qytetarëve të nderuar durrsakë, që e duan me gjithë mend qytetin e tyre, të marrin në dorë fatet e tij dhe ta mbrojnë atë që mund të mbrohet. Ka ardhur një moment që nuk mban më. Po humbim qytetin tonë të mrekullueshëm. Po e humbim me të gjitha vlerat e tij. Po e humbëm, nuk ka Zot që ta rikuperojë më, në atë famë e stimë që ka pasur gjatë kohërave.
